Jesus deka Megai Jari Kitai

“[Jesus ngau bala murid Iya] angkat ari kanisa lalu terus mansang ngagai rumah Simon saduai Andrew. James saduai John mega bela enggau sida. Mentua Simon ti indu kena sakit, sereta Jesus datai ba endor nya iya lalu ditusoi ka pasal utai nya. Jesus mansang ngagai iya, megai jari iya, lalu ngangkat ka iya. Iya gerai, lalu angkat mela sida.

Leboh hari nyau lemai, sida mai orang ti sakit enggau orang ti dirasok antu ngagai Jesus. Samoa orang mayuh di nengeri nya begelumu ba moa rumah. Jesus nyuman ka mayoh orang ti kena laban mayoh macham penyakit, lalu muai mayoh antu ari sida. Iya enda ngasoh antu nyebut utai nama-nama, laban sida ngelala iya”
(Mark 1:29-34, Berita Manah ka Rebak Diatu).

Berita pasal Jesus nyuman ka orang ti sakit – pegari amat. Udah lemai ari Sabbat, maioh amat orang datai bebai ka bala pangan ti sakit deka minta disuman ka Tuhan Jesus. Penyinu enggau pengasih Jesus udu amat meda samoa sida ke mayoh macham penyakit enggau sida dirasok antu. Jangkak aku, Jesus bejako enggau tiap-tiap iko sida, lalu ngengkah ka jari Iya ba tiap-tiap iko sida ti sakit, lalu suman. Peda gaya Iya megai jari mentua Simon Peter ti sakit, lalu ngangkat ka iya (1:31). Ati Jesus penoh enggau penyinu.

Samoa orang chukup lantang amat ati, jangkak aku agi sidak iya bepegai ba kaki enggau baju Jesus lalu nyungkor ka diri beterima-kasih. Sekeda orang ke dirasok antu tentu bisi manjong: “Nuan meh Anak Allah Taala” – lalu dirara Jesus laban sida nemu serta ngelala Iya. (Sama sebaka enggau antu dalam Mark 1:24). Endang amat meh jako ke dikingat ka bala Rasul ari Bup Nabi Isaias: “Iya empu ngenat ka samoa penusah, lalu deka ngasai ka pemerat penusah kitai.” Sida nemu Tuhan amat sinu ka anembiak Iya maia sida ditinggang pemedis enggau penusah, sampai mega Iya empu ensepi pemedis kitai (Laban Iya empu nyadi mensia alu begulai enggau kitai).

Nya amat penyinu – nyepi penusah, pengirau, pemedis orang baka pemedis diri empu. Enti kitai bisi penyinu tu, kitai sebaka amat enggau Tuhan. Ukai mimit aja orang ti dituntong penusah: orang sakit, orang ti kediri-diri, ti silu-ilu, ti tusah. Anang kitai enda peduli. Tang berati ka penusah orang nya, ngambi bisi ungkup ba penusah iya, mending ka iya, lalu mega besembiang ka iya. Au, besembiang sama-sama enggau iya. Ati kitai anang baka batu. Ari Jako Tuhan tu, kitai meda Jesus deka amat ngenjauh ka orang ari penusah enggau pemedis bakatu enggau kuasa Iya ti besai lalu enggau pengasih Iya. Kangau ka Nama Iya aja. Lalu tekala nya Iya enggau nuan.

Sembiang

O Jesus, amat mayoh orang dituntong penusah: tabin, menawa, sakit ontak, tuai lalu nadai orang ngibun, silu-ilu, dikacau antu, enggau mayoh bengkah penusah bukai. Tulong aku ngelala Nuan dalam samoa sida. Lalu rajin agi merindang sida. Amen.

THINK BIG. START SMALL. GO DEEP.

Diambik, disemak, disalin ngau diubah ulih aku ari Mending Ka Tuhan: Berati ka Injil St Mark

Ditusun ulih F.A. Vergeer M.H.M.