Jesus, Anak Allah Taala: Antu Sitan Besugang di Mua Iya (Mark 5:1-20)

“Lebuh Jesus angkat ari perau lalu niki ke tebing, siku orang ke dirasuk antu lalu tekala nya pansut ari pendam lalu mansang ngagai Iya. Orang nya diau ba sebelah pendam, lalu nadai orang ulih masung iya; ngena rantai pen enda meh ulih, laban iya suah udah ditanchang ngena rantai lalu dikunchi, tang iya mutuska rantai lalu mechahka kunchi nya, lalu nadai orang ulih merekuhka iya. Siang malam iya bejalai segau-segau ba sebelah pendam, enggau ba sebelah bukit, rauh-rauh sereta ngurik diri ngena batu. Lebuh iya tepedaka Jesus ari jauh, iya belanda lalu meremi di mua Jesus, lalu manjung enggau pengabis penginggar nyawa iya. Ku iya, ‘Nama utai ti deka dikereja Nuan ba aku, Jesus, Anak Allah Taala ti Pemadu Tinggi? Dalam nama Allah Taala, anang merinsaka aku!’”
(Mark 5:1-7, Bup Kudus Baru).

Nyelai amat cherita tu, pasal Jesus ngeraika orang ke dirasuk antu. Amat kering serta bekuasa antu nya; bala antu ti diketuai antu Sitan! Bakani gamal antu Sitan? Kati Allah Taala ngaga antu? Lapa Iya ngaga utai ti jai baka nya? Ukai Allah Taala ngaga sida jai baka nya. Terubah iya, Tuhan ngaga mayoh amat roh ti badas serta besai agi kuasa ari mensia. Roh tu dikumbai Bup Kudus – Melikat. Allah Taala nya pengerindu, nya alai Iya enggai maksa sida rindu ka Iya lalu ngasi ka Iya. Iya meri ka sida peneka diri empu awak ka sida rindu ka Iya ari peneka diri empu. Tang sekeda bala melikat dulu kelia nyau besai ati lalu enggai ngasi ka jaku Allah Taala. Sida deka nyadi besai agi ari Tuhan, lalu ketegal nya sida nyadi antu-antu jai ti diketuai Antu Sitan. Baka melikat, sida udu pintar lalu besai kuasa, tang kelalu jai.

Maya Tuhan Jesus diau di dunya, sida antu tu udu ngachau mensia laban Jesus bedau parai ngelepaska kitai ari dosa serta kuasa Sitan. Enggau pemarai Iya (lalu angkat ari mati) Jesus “nanchang [Sitan] ke kering nya” (Mark 3:27). Amat jarang mensia dirasuk antu abis lengis baka orang dalam Mark 5:1-20 tu. Dalam cherita tu, pengawa antu Sitan dipeda kitai suka ngachau serta ngerusak mensia. Macham-macham ti digaga sida ngagai kitai mensia: 1) Iya ngiga peluang ngachau untak serta penemu kitai awakka kitai charut serta enda nemu jalai Allah Taala agi tang gila ka utai didunya tu aja; 2) Iya ka ngachau ati, ngasoh kitai badu lantang lalu takut aja; 3) Iya ka ngachau semengat, awakka kitai slalu ngenangka penyalah serta dosa diri lalu enda ingat ka penebus darah Tuhan Jesus ka kitai; 4) Iya ka ngachau tuboh, ngasoh kitai sakit baka orang ti dirasuk antu tu. Iya “ngurik diri ngena batu” (Mark 5:5); 5) Iya ka ngachau semoa utai didunya tu mega baka iya tama ngagai babi “lalu belanda nurun tingkah ngagai danau, lalu lemas” (5:13).

Taja pan kuasa iya udah dialahka Tuhan Jesus di kayu regang, bala antu Sitan agi megai dunya tu. Sida agi bekuasa sampai Tuhan Jesus datai ke dunya ke dua kali iya, baru sida antu Sitan dibuai ke api neraka belama-lama iya. Nyak alai maya sida di mua Tuhan Jesus, sida enda tau enda besugang di mua Iya! Sida nemu siapa Tuhan Jesus tu, iya nya: “Anak Allah Taala ti Pemadu Tinggi!” Jesus jauh besai agi lalu tinggi agi kuasa ari sida semoa. Semoa rantai didunya tu enda ulih nanchang Sitan; tang seleka jaku Jesus umbas ngasoh Sitan ngasika Iya lalu pansut ari orang ti dirasuk antu [Jesus bejaku ngagai antu nya, “Pansut nuan ari orang tu, nuan roh ti jai!” (Mark 5:8)]. Jesus meh Tuhan atas penyakit; Tuhan atas hari Sabat; Tuhan atas kabut serta gelumbang; Tuhan atas semoa roh-roh didunya, serga serta neraka (semoa tu ulih dibacha kitai ari Injil St. Mark).

Enti kitai arap amat ka Iya, kuasa Iya enggi kitai mega. Antu Sitan nadai kuasa ngagai kitai; kitai ulih ngalahka iya enggau pengarap serta kuasa Tuhan Jesus. Kitai udah menang laban Tuhan Jesus Kristus dalam pengidup kitai!

Sembiang

Tuhan Jesus ti besai kuasa, Sitan agi mayoh jalai ngachau tuboh, ati enggau runding aku awakka charut lalu enda mikirka Nuan. Aku besampi awakka aku tetap arap ka Nuan aja. Jesus, nyadi meh Tuhan dalam tuboh serta semengat aku. Nuan idup lalu merintah dalam aku belama-lama iya. Amen.

THINK BIG. START SMALL. GO DEEP.

Jesus deka Kitai Nanam ka Benih Jako Iya [Anang Putus Pengarap] (Mark 4:26-32)

“Ku Jesus mega bejaku, ‘Perintah Allah Taala nya baka orang siku ke naburka benih ba tanah. Malam hari iya tinduk, lalu lebuh siang hari iya angkat, tang iya enda nemu baka ni ku utai nya matuk lalu tumbuh. Tanah nya ti ngeluarka asil, terubah, batang pegari, udah nya utai nya murai, lalu udah nya tangkai pegari. Tang lebuh utai nya nyau mansau, orang lalu tekala nya ngerat batang iya ngena sabit, laban nya endang maya ngetau’”
(Mark 4:26-29, Bup Kudus Baru)

Sapa ngasoh “benih” nyak idup lalu tumboh? Ukai iya ti “naburka benih.” Benih empu bisi kuasa dalam iya ti ngasoh iya “matuk lalu tumbuh.” Nama erti sempama tu? Orang ti naburka benih ba tanah tu iya nya baka orang ti ngereja pengawa Tuhan Jesus. Iya nanam perintah Allah Taala; iya nanam kuasa Jako Tuhan, peneka Iya, pengerindu Iya, ngau nanam Jako ajar Iya ngagai orang lain. Pemansang “benih” nya enda ditentu tauka bepanggai ba pengawa kitai empu serta penemu kitai, tang ba kuasa Allah Taala ti belalai ngereja ka pengawa Iya. Semina Tuhan aja ti ulih nyadika benih nya tumbuh lalu “mansau.”

Ko Saint Paul ngenang ka pengawa iya nanam ka Perintah Allah Taala ba menoa Korint: “Aku nanam, Apollos manjah, tang Allah Taala ti ngasuh utai nya tumbuh. Nya alai, iya ke nanam, enggau iya ke manjah, sama nadai tentu guna. Semina Allah Taala aja ke ngasuh utai nya tumbuh” (1 Korint 3:6-7). Amen!

“Jesus mega nyebut, ‘Baka ni ku kitai mandingka Perintah Allah Taala? Tauka sempama ni ti deka dikena kitai madahka pasal Perintah nya? Perintah Allah Taala nya baka igi mustard, leka ti pemadu mit di dunya tu. Tang lebuh iya udah ditanam, iya tumbuh lalu nyadi utai ti besai agi ari semua utai bukai ti ditanam. Iya mansutka dan ti besai, datai ke burung nyau ulih ngaga tansang di baruh iya’”
(Mark 4:30-32).

Ditu Jesus madah: “Perintah Allah Taala nya baka igi mustard, leka ti pemadu mit di dunya tu.” Amai ko jako Jesus empu, maya Iya niri ka Gereja Kristian ti mula-mula, Iya belaboh ngena jalai ti mit amat – 12 iko orang Rasul aja. Taja pia, maya tok Berita Manah Tuhan Jesus Kristus udah “tumbuh nyadi utai ti besai agi ari semua utai bukai ti ditanam”! Berita Iya udah pambar di sabelah dunya. Bakani Gereja ulih “mansutka dan ti besai” baka nya? Ukai ari penemu Rasul-Rasul, tauka penulong gereja, tauka bala pastor; ukai ari penemu serta pemadas orang Kristian, tang ari – kuasa Allah Taala ti numbuhka Gereja Iya. “Semina Allah Taala aja ke ngasuh utai nya tumbuh.” Roh Allah ngasoh iya mansang serta kering, lalu merkat ka orang bukai baka “burung nyau ulih ngaga tansang di baruh iya.”

Baka nya mega enti kitai ka naburka “benih” tauka “igi mustard” – Jako serta pengarap Kristian – ba sebarang endur kitai diau. Tuhan Jesus madah disebarang endur kitai diau; di rumah, di gereja, di tempat kitai gawa, ba skula, dini aja alai kitai diatu, Iya deka kitai niri ka Perintah Allah Taala. Ka terubah iya nang mimit aja orang ti ka ninga ka Berita Manah, tang kitai anang putus pengarap! Perintah Allah Taala deka nerima siapa aja ti deka arap ka Tuhan Jesus. Orang kaya tauka miskin, bepelajar tauka nadai skula, bepangkat tinggik tauka orang ti baruh – Jesus deka nerima semua. Sekalik agi, anang putus pengarap! Roh Tuchi bisi enggau kitai. Asal kitai bisi nanam “benih” Perintah Iya, lalu manjah ngena “aik,” iya nya enggau ajar serta sembiang kitai, anang kitai irau ka penyadi iya. “Semina Allah Taala aja ke ngasuh utai nya tumbuh.” Arap ka Iya!

Sembiang

O Tuhan Jesus Kristus, Nuan ka amat bepanggai ba kami ti nanam Perintah Nuan lalu manjah iya ngenak ajar serta sembiang kami. Tulong kami enda putus pengarap, tang kering ka kami. Laban Nuan aja ti nemu ngasoh Gereja Nuan tumbuh lalu bebuah manah. Terima kasih Jesus ketegal nya. Amen.

THINK BIG. START SMALL. GO DEEP.

Jesus meh Penabur ti Badas: Bakani Ati Nuan Nerima Jako Allah Taala? (Mark 4:1-20)

“Jesus lalu belabuh ngajar baru ba tebing Danau Galili. Mayuh amat orang begempuru ngelingi Iya. Nya alai Iya nepan sebuah perau ti lagung-lagung ba danau nya, lalu nudukka diri dia, lalu semua orang mayuh bediri ba tebing. Iya lalu belabuh ngajar sida mayuh macham utai ngena jaku sempama. Ku Iya: ‘Dinga kita! Siku penabur benih mansang naburka benih…’”

(Mark 4:1-3, Bup Kudus Baru)

Nama kabuah Jako Allah Taala enda diterima kitai mensia? Kati “benih” nya jai? Ukai. “Benih” nya meh Jako Pengidup, jako Berita Manah pasal perintah Allah Taala. Kati “penabur benih” nya jai? Ukai. Tuhan Jesus empu ti Pengajar Dunya. Iya penabur ti badas amai. Kabuah Jako Allah Taala enda diterima kitai mensia ukai laban “penabur benih” tauka Pengajar enda manah, tang laban ati orang ti ninga Jako Allah Taala enda tebuka – semina orang ti mereti ka Jako Iya serta ati ti tebuka ajak deka diselamat ka Iya.

Sekeda ati orang baka jalai: “Benih ti labuh ba jalai nya orang ke ninga jaku nya. Lebuh sida ninga jaku nya, Sitan datai tekala nya lalu ngerampas jaku nya ari sida” (Mark 4:15). Sida amai bisi ninga tang enggai berunding ka jako ajar nya dalam ati. Maya badu ninga, Sitan ngerampas ka jako nya ari sida, lalu sida badu ingat ka jako ajar nya agi.

Sekeda ati orang baka tanah ti bebatu: “Benih ti labuh ba tanah ti bebatu nya orang ke gaga ati ninga lalu nerima jaku nya. Tang sida nadai urat, lalu tan enda lama. Lebuh penusah tauka pemerinsa datai ketegal jaku nya, sida lalu tekala nya mungkir” (Mark 14:16-17). Nama kabuah nadai urat? Laban sida nadai kering pengarap. Saritu nitih ka jako orang tu, lalu pagila ninga ka jako orang lain. Sida gaga ati ninga ka jako nya tang maya bisi penusah ngau pemerinsa (taja pan ia mimit aja) sida jampat ngalah. Kati ko tua, bisi gak kadang-kadang baka nya?

Sekeda ati orang baka madang duri: “Benih ti labuh ba madang duri nya orang ke ninga jaku nya, tang pengangkun sida ke dunya, enggau pengerindu sida ke pengaya, enggau pengingin sida ke utai bukai, tama lalu ngalahka jaku nya, lalu jaku nya enda bebuah” (Mark 14:18-19). Nama erti “pengangkun sida ke dunya”? Sida tu irau amat pasal pengidup sida baka pemakai tauka utai ti dikena seari-ari sampai ka nadai ari ka berati ka Jako Tuhan. “Pengerindu sida ke pengaya”? Sida tu taja pan udah cukup pemakai enggau utai ti di kena, sida udu ingin ati ngiga mayoh agi pengaya di dunya tu. “Pengingin sida ke utai bukai”? Sida tu bisi pengingin ka utai kamah, pengingin deka nyadi orang besai serta tinggi pangkat, pengingin bejudi enggau mayoh utai bukai.

Semina sekeda ati orang baka tanah ti manah: “Tang benih ti labuh ba tanah ti manah nya orang ke ninga jaku nya, nerima iya lalu bebuah tiga puluh, enam puluh, enggau seratus kali lipat” (Mark 4:20). Sida tu baka “tanah ti ami.” Maya jako Allah Taala labuh ba ati sida, ia “tumbuh lalu mansang besai lalu bebuah lebat” (Mark 4:8). Sida muka ati sida enggau ati ti lantang nyambut Jako Allah Taala lalu deka amat nitih ka perintah Iya – ninga serta ngereja ka pengawa Tuhan.

Baka ni ko ati nuan? Bakai jalai lalu jako dirampas Sitan? Baka tanah ti bebatu ti nadai urat? Baka madang duri ti enda ngasuh jako bebuah? Tauka ati nuan baka tanah ti manah – tanah ngelak benih Jako Allah Taala tumbuh ba ati nuan lalu mansang besai lalu bebuah lebat? O menyadi, mintak meh ati nuan baka “tanah ti manah” ngau besampi ka Tuhan Jesus Kristus awakka ati nuan nyimpan ka Jako Allah Taala lalu bebuah dalam pengidup nuan.

Sembiang

O Tuhan Jesus, Nuan ti Penabur Jako Allah Taala, buka pending enggau ati aku ngambi ka aku nyambut Jako Nuan enggau ati ti manah lalu mansut ka buah ti manah – iya nya pendiau ti badas. Amen.

THINK BIG. START SMALL. GO DEEP.

Jesus, Aku Sedia Deka Mending ka Penemu Enggau Runding Nuan

“Ko Jesus bejako enggau orang ti mati berang sapiak, ‘Mansang ka moa kitu.’ Udah nya ko iya nanya orang mayoh, ‘Nama utai ti di-asoh Allah Taala kereja kitai leboh Hari Sabat? Nulong, tauka ngemedis ka orang? Ngidup ka seput mensia tauka munoh nyawa ia?’ Tang sida nadai bejako saleka. Jesus ringat leboh iya merening sida, tang iya mega lalu sinu meda sida, laban sida kelalu kieh sereta salah. Udah nya ko iya bejako enggau orang, ‘Unjor ka berang nuan.’ Orang nya ngunjur ka berang iya, lalu berang iya suman nadai utai ngawa. Nya alai sida orang Parisi lalu angkat ari kanisa terus baum enggau bala anembiak Herod, ngiga jalai kena ngelaban Jesus lalu munoh iya” (Mark 3:3-6, Berita Manah Ka Rebak Diatu).

[“Berang sapiak” bermaksud tangan lumpuh sebelah]. Leboh Hari Sabat, Tuhan Jesus tama ka dalam kanisa tauka balai gempuru (rumah sembiang orang Juda). Maya nya bala orang Parisi endang deka nekan ka Jesus ngereja utai ti salah awak ka sida ulih nangkap Iya. Bala orang Parisi kieh amat ati. Sida rindu ka runding diri aja lalu ngumbai samoa orang bukai salah.

Bisi dua macham pengringat ngau dua macham runding dalam crita tu: 1) “Jesus ringat leboh iya merening sida” orang Farisi baka nya. Iya ringat tang nemu nagang pengringat Iya enggau manah. Dalam pengringat Jesus, Iya mega “sinu meda sida”; 2) Bala orang Farisi “kelalu kieh sereta salah.” Pengringat sida enda di-tagang sida lalu mai sida begedi. Jesus deka ngidup ka orang, tang kategal pengringat orang Farisi deka munoh orang. Dalam kedua-dua chunto tu, nama macham pengringat nuan? Nya alai bisi utai ti di-pelajar kitai ari Injil Mark tu: Enti orang enggai berubah runding, nya ukai laban nadai orang ngajar sida. Jesus nemu amai ngajar tang sida bala orang Farisi tetap enggai berubah. Lapa? Laban sida ngumbai runding diri sigi (sabaka tauka manah agi ari) runding Allah Taala empu. Tu salah mai!

Kati ko tua ulih di-ajar? Kati tua mending ka orang, tauka arap ka runding diri aja lalu ngumbai iya badas ari samoa? Ingat anembiak Apai ti di-serga: Kitai patut baroh ati, lalu nemu diri kurang bepenemu. Buka ati kitai lalu sedia deka mending ka penemu Allah Taala. Baka nya kitai ulih nitih ka jalai-Iya – ukai jalai diri empu. Baroh ka ati laban mayoh pengawa ti jai bendar baka perang, bebunoh, sigi digaga orang laban sida ngumbai nya peneka Allah Taala tang sebenar iya datai ari runding diri empu ti bedosa. Ingat mega, enti kitai ngumbai diri nerima pesan Allah Taala, anang arap ka diri aja tang padah ka pesan nya ngagai raban Kristian ti bukai ti ulih di pechaya awak ka sida ngabas pesan nya, enggai ka kitai arap ka runding diri empu aja.

Sembiang

O Tuhan Jesus, pengingin ati aku suah salah laban enda di-tagang enggau runding ti manah. Iring runding aku, lalu tulong aku selalu nitih ka iring Nuan. Asoh aku baroh ati lalu mending ka runding orang Kristian ti bukai ti bepenemu dalam jako Tuhan, laban nya meh jalai Nuan ngiring ka aku. Amen.

THINK BIG. START SMALL. GO DEEP.

Jesus, Kami Nyerah ka Pengirau ngau Penusah Kami ngagai Nuan

Jesus tumu-tumu pagi ngagai endor ti sunyi alu besembiang. (Gambar chunto aja)

“Tumu-tumu pagi siti, apin rerak tawas, Jesus angkat ngejang ka rumah nya. Iya pansut ari kandang nengeri lalu mansang ngagai endor ti sunyi, besembiang dia”
(Mark 1:35, Berita Manah ka Rebah Diatu).

Nyangka bisi penusah datai ba kitai kadang-kadang baka utang kitai empai dibayar lalu nadai duit, nuan sakit, orang nganu nuan, serta mayoh utai bukai. Nama digaga nuan? Engka beperagam aja enggau ati ti irau, lebih agi leboh malam ari? Engka udah besembiang mega tang (nuan mikir) Allah Taala enggai ninga lalu badu meh nuan? Engka nuan besembiang aja semadi bisi penusah?

Peda chunto Tuhan Jesus: Iya lelak nyuman ka orang ti sakit serta mending ka penusah orang mayoh. Lalu leboh tumu-tumu pagi, Iya ngagai endor ti sunyi lalu bersembiang, Iya nya mantai ka semua pengirau Iya di moa Apai Iya. Lalu penusah Iya ti besai tadi nyau lempong selempong. Ukai Allah Taala muai penusah kitai maya kita sembiang, tang Iya negu ati kitai lalu ngering ka kitai, nulong kitai ngesan Iya. Lalu nya mai pengelantang ati kitai.

Pia kitai. Ambi ka chunto agi: orang tuai (tauka menyadi, pangan nuan, tauka orang bukai) nganu nuan enggau nyebut utai ti enda patut disebut ngagai nuan – nuan ringat ati. Runding ati nuan deka malas, deka ngereja utai ti enda manah. Sekumbang besembiang agi meh pikir ti ringat ngacau nuan. Nama digaga nuan? Bantai pengirau ngau penusah nya di moa Allah Taala, Apai nuan. Ringat meh ati nuan di moa Tuhan. Iya sigi rindu nyambut kitai. Iya negu ati kitai, lalu meri runding ti badas ngagai kitai. Engka iya ti nganu nuan ukai ka ngemedis ka nuan. Engka nuan empu bisi salah mega. Belubah-lubah pengelantang pulai ngagai ati nuan. Lalu uji perati ka pikir ti badas ti diberi Tuhan maya-nya, laban nya meh peneka Allah Taala – nya patut dititih ka kitai.

[Enti nadai pikir ti badas datai ba ati nuan, buka meh Bup Kudus. Tu meh Jako Tuhan Jesus ngagai kitai. Ngena Bup Kudus, Allah Taala deka bejako ngau nyaut nuan ngenang ka pengirau nuan.]

Sembiang

Nuan Tuhan Jesus, Anak Allah Taala, udah ngesan penyakit penyalah kami, lalu udah nyepi penusah kami datai ka bukit Kalvari, aku nyerah ka Nuan pengirau aku. Awak ka Nuan negu iya lalu ngaga iya lempong. Lak Jako Nuan ari Bup Kudus negu kami. Nuan enggau kami. Amen.

THINK BIG. START SMALL. GO DEEP.

Jesus, Nuan Meh Raja Pengidup Aku (Sapa dititih Nuan?)

“[Jesus ngau bala murid ya] datai di nengeri Kapernaum, lalu leboh Hari Sabat Jesus mansang ngagai Kanisa, lalu belaboh ngajar. Orang mayoh alit bendar ati ninga utai ti di-ajar Iya. Iya enda baka sida pengajar Adat, tang Iya ngajar ngena kuasa. Leboh nya bisi siko lelaki ti dirasok antu mansang ngagai kanisa, lalu nyeraoh, ko iya, ‘Nama ti deka digaga nuan enggau kami, Jesus ari Nasaret? Kati nuan kitu deka ngerusak kami? Aku ngelala nuan: nuan tu seruan Allah Taala ti kudus!’ Jesus merintah antu, ‘Anang inggar, pansut ari orang tu!’ Antu nya ngusak orang nya, lalu iya nyeraoh sereta pansut ari orang nya. Orang mayoh bela alit ati, nya alai ko sida bejako enggau pangan diri, ‘Nama utai tu? Kati tu ajar ti baru? Orang tu bisi kuasa bejako enggau antu, lalu sida ngasi ka jako iya!’ Lalu berita pasal Jesus ngelekai jampat bendar di serata menoa dalam kandang Galili”
(Mark 1:21-28, Berita Manah Ka Rebak Diatu).

Kelia aki-ini kitai agi ngayau. Bakani gaya pendiau orang Iban maya nya? Nyamai kini? Raja tauka ketua bisi, tang iya mega ngayah ke orang, ngasoh nyadi ulun iya… Udah Rajah Brooke datai, bisi nyamai mimit. Tu tau dibanding enggau kitai mensia. Kenyau ari penyalah Adam (ngau Hawa) kelia kitai diau dalam pemetang. Raja bisi, lalu megai kuasa. Iya jaoh jai ari Raja Kelia. Sapa? Sitan! Taja mayoh orang amat manah pendiau naka olih tang antu agi nanchang sida, ngasoh sida takut ka iya, nitih ka iya, miring ka iya, nundok ka iya.

Dalam Injil tu bisi orang ti dirasok antu jai, betungga moa enggau Tuhan Jesus Kristus. Nya meh dua iko Raja. Sapa menang? Tuhan Jesus! Sapa alah? Raja pemetang, antu Sitan. Sapa dipilih nuan ka Raja ari kedua-dua Raja nya? Enti nuan nitih ka Jesus, anang ngemesai ka diri baka Parisi ngumbai diri kering, badas, tang ngaku diri udu beguna ka kuasa Tuhan Jesus, udu ditanchang ngena rantai Raja Penyai.

Engka ka nuan 1) Agi takut ka mimpi jai, agi arap ka burong, pengaroh tauka manang; 2) Takut ka mayoh bengkah pemali baka pemali orang ti ngandong enggau pemali bukai; enggau 3) Utai ti lebih agi nanchang kitai iya nya perangai ti jai, ti enda sebaka dalam siko-siko, baka – sekeda selalu ka ngirup langkau, sekeda nyabong, tauka tegian main judi, pemula, jampat ringat, begedi, ka amat ngenyai ka tuboh diri, tauka tuboh orang, burok kerja, burok sembiang, enggau ka mayuh utai bukai agi. Tiap kitai sigi nemu perangi diri empu. Tu meh utai ti dikena ka Sitan nanchang ka kitai.

Anang bejako munyi tu: “Perangi nya enda olih dibuai. Sigi lekat ba aku baka rantai.” Bisi siko Raja ti nemu muka semua rantai nya. Iya udah parai lalu angkat idup baru kena Iya ngalah ka kuasa pemarai enggau semoa pengelemi. Enti kitai udu arap ka Iya, Iya ulih alu deka ngalah ka perangi burok nuan ti jai. Semoa utai ti nanchang kitai lebih-lebih agi – dosa enggau kuasa dosa – deka dikalah ka Iya. Kitai patut nyerah diri ngagai kuasa besai Iya awak ka Iya nyadi Raja dalam ati, dalam pendiau kitai. Siapa Raja nya? “Yesus ari Nasaret, seruan Allah Taala ti kudus”.

Sembiang

O Tuhan Yesus, aku nyerah diri ngagai Nuan: tuboh aku, semangat aku, ati aku, runding enggau pengawa aku. Nuan di ambi aku ka Raja pendiau aku. Enggau kuasa besai Nuan, O Tuhan Jesus, ibun meh aku. Amen.

THINK BIG. START SMALL. GO DEEP.