Jesus mai Kitai nudok ka Perintah Allah Taala

“Udah John [Pemaptisa] kena tutup, Jesus mansang ngagai menoa Galili lalu ngajar Berita Manah ari Allah Taala. Ko iya, ‘Timpoh ti patut udah datai, Perintah Allah Taala nyau semak! Lengka ka dosa kita lalu arap ka Berita Manah!’ Leboh Jesus bejalai di tebing Tasik Galili, iya meda dua iko orang berikan diri menyadi, Simon enggau menyadi iya Andrew, benong mukat ba tasik. Ko Jesus bejako enggau seduai, ‘Titih ka aku, lalu aku deka ngajar saduai jalai ngulih ka mensia.’ Saduai ninggal ka pukat lalu nitih ka iya.

Angkat ari nya Jesus meda dua iko agi orang diri menyadi, James seduai John anak Sebedi. Seduai dalam perau nyendia ka pukat saduai. Sereta Jesus meda saduai iya lalu ngangau ka saduai. Saduai ninggal ka apai saduai dalam perau enggau orang ti digaji saduai, lalu angkat nitih ka Yesus”

(Mark 1:14-20, Berita Manah ka Rebak Diatu).

Nuan diau dalam perintah Malaysia lalu dipegai parti politik ti badas (tauka enda), ko runding nuan. Tang nama ko Tuhan Jesus tadi: “Perintah Allah Taala nyau semak”. Kati kitai diasoh badu nyadi kaban perintah Malaysia, badu dipegai perintah? Ukai. Nya manah lalu nya peneka Allah Taala. Reti Perintah Allah Taala iya nya: Allah Taala nyadi Tuai, nyadi Raja, nyadi Perintah kitai, lalu kitai rakyat Iya. Lalu kitai nitih ka atur sereta peneka iya lebih ari semoa atur bukai. Peneka Allah Taala dititih dalam pengawa politik, dalam hal pelajar, dalam semoa utai ti dikereja kitai di dunya tu, di rumah, di tanah, ba tuboh, ba semengat kitai. Pia Perintah Allah Taala datai.

Enti pia anang ngasoh pengawa politik tauka pengawa ti bukai nyadi pun pengidup nuan lebih ari semoa, lalu Perintah Allah Taala enggau peneka Iya nadai endor agi. Nya pulai ka mayoh macham penyalah baka belaya, begedi, ngakal, nipu, datai ke rumah pechara. “Lengka ka dosa kita lalu arap ka Berita Manah!” ko Jesus tadi. Berubah amat-amat. Badu bepun ka peneka ati enggau roh dunya tang bepun ka peneka Allah Taala enggau perintah Iya; nya ngasoh semoa kitai diau baka diri menyedi (lebih-lebih agi kita orang Kristian) taja enda sebaka parti tauka bansa. Tuhan Yesus Kristus meh kepalak kitai. Iya meh Berita Manah tu.

Jesus lalu ngangau ka empat iko murid awak ka sida nulong Iya ngerembai ka Berita Manah nya, lalu sama ngau Iya nudok ka perintah Allah Taala. “Titih ka aku, lalu aku deka ngajar saduai jalai ngulih ka mensia,” ko Jesus, iya nya ngulih ka mensia ka dalam Perintah Allah Taala. “Saduai ninggal ka pukat lalu nitih ka iya,” kati ko nuan? Enti Tuhan nyadi Raja sereta Perintah dalam pengidup nuan, tentu nuan sedia ati deka amat enggau Iya nudok ka Perintah Allah Taala dalam ati orang bukai mega. Uji diatu nyerah ka diri enggau pengambis ati awak ka Tuhan ulih beguna ka nuan nudok ka Perintah-Iya ngena sebarang jalai ti di deka Tuhan.

Sembiang

O Tuhan Yesus Kristus, aku nyerah ka diri, peneka enggau pengawa aku, ngagai Nuan awak ka nyadi rakyat Nuan ka peneka Nuan aja dititih dalam semoa pengawa aku. Enti Nuan ngagau ka aku ba sabarang pengawa ngerembai ka Perintah Nuan dikeliling aku – tu meh Aku Tuhan kena meh aku. Amen.

THINK BIG. START SMALL. GO DEEP.