Jesus dikering Ka Pengawa Ia (Pia Kitai Mega)

Gambar ti dilukis orang, ukai sebenar. 

“Enda lama udah nya Jesus datai ari Nasaret, dalam menoa Galili, lalu John maptisa iya dalam ai Jordan. Sereta Jesus pansut ari dalam ai, iya meda langit tebuka lalu Roh nurun atas iya baka burung aching. Lalu nyawa bisi didinga ari langit, ‘Nuan tu Anak ti dikesayau ka aku. Aku rindu bendar ka nuan.’ Tekala nya Roh lalu mai iya ngagai nemoa puang. Iya diau dia empat puloh ari empat puloh malam, lalu kena uji Sitan. Iya diau begulai enggau jelu kampong, tang melikat datai lalu ngintu iya”

(Mark 1:9-13, Berita Manah Ka Rebak Diatu).

Maya aku agi mit, aku diau belalai dalam rumah apai-indai. Aku tentu nadai nemu megai tanggong jawap besai. Pengawa mit mega baka ngibun madi aku ti mit, suah aku enda peduli ka. Tang dalam peragam ati, dia aku sigi orang besai serta beguna, baka pilot, jeneral tauka penyanyi ti beberita.

Tuhan Jesus diau belalai ba rumah apai-indai Iya selama 30 taun. Tang maya Iya 30 taun umor, dia Iya ninggal ka pengidup belalai Iya, dibaptisa ba dalam ai Jordan olih John Pemaptisa, lalu langit tebuka, Roh Kudus nurun atas iya. Nama digaga Roh? Iya nyedia ka Jesus ngereja pengawa enggau tanggong jawap ti diberi Allah Taala Apai ngagai Jesus, Anak Allah Taala. Nama pengawa nya? Nyadi Pengajar dunya. Nyadi Pengibun Badas. Nyadi mega Penebus Dunya ti deka meri nyawa diri ketegal samoa kitai. Enggau pandak – nyadi Mesiah. Tang ukai tekalanya Jesus belaboh ngereja samoa pengawa nya. Roh Kudus nyendia iya dulu selama 40 hari ba menoa puang, menoa sunyi.

Nuan tentu nitih ka chunto Tuhan Jesus; nuan udah dibasu pala mega (iya nyak, nuan udah dibaptiska). Roh Kudus udah datai ba nuan. Kuasa Roh udah digerah enggau kering agi enti nuan udah nerima pengetap (enggau pengarap), lalu bendar agi enti kuasa Roh udah dilepas ka ba nuan maya nuan nerima Yesus nyadi ka Tuhan ngau Penyelamat nuan. Nya alai badu kitai diau belalai, baka anak mit ti enda nemu megai pengawa berat. Roh empu udah nyendia ka nuan ka tanggong jawap nuan dalam bilik nuan, di rumah, ba opis, ba sekolah, ba barang endor nuan diau. Lalu pengawa diberi Roh ka nuan iya nya ngambik ungkup ari pengawa Jesus empu: ngajar pesan Tuhan, ngereja ngau niri ka Perintah Allah Taala ba barang endor nuan diau, nyadi ulun Tuhan nebus orang ari penyai ngau ngelepas ka sida ari dosa. Roh Kudus empu meri penau ka nuan, tang enda sebaka ba siko-siko.

Tang anang terus ngereja pengawa nya. Dulu nitih ka Tuhan Jesus ngagai endor sunyi; angka ukai (semesti ya) 40 ari, tang kadang-kadang sahari dua (dikumbai “retreat”) sajam atau setengah jam pama meh atau sekalika 15 minit enti ninting ari. Maya nya nuan meri ka ati nuan ngagai Roh Kudus nyendia nuan ka sebarang pengawa ti kedeka iya nunda ka penau ti udah diberi iya ka nuan. Dia iya ngering ka nuan mega ngelaban penguji Sitan ti mesti datai. Nuan mesti ngambi masa sunyi baka Tuhan Yesus sebedau ngereja ka pengawa Iya.

Sembiang

Jesus Pengajar aku, Pengibun enggau Raja serta Penebus aku, lepas ka kuasa Roh Nuan udu agi dalam aku, awak ka aku sedia ngereja barang pengawa ti kedeka Nuan, nyadi ulun Nuan niri Perintah Allah Taala. Nuan Anak ti dikesayau ka Apai. Amen.

THINK BIG. START SMALL. GO DEEP.

Diambik, disemak, disalin ngau diubah ulih aku ari Mending Ka Tuhan: Berati ka Injil St Mark

Ditusun ulih F.A. Vergeer M.H.M.