Nuan Deka Nyadi Murid Jesus Bakani: John, Herod tauka Herodias? (Mark 6:14-29)

“Nyadi orang ti udah nangkap John Pemaptisa suba ari asoh Rajah Herod empu, lalu disimpan iya dalam tutup. Kebuah Herod ngereja utai nya laban Herodias, ti udah jadi enggau iya, taja indu nya bini menyadi iya ti benama Pilip. John Pemaptisa selalu madah ngagai Herod, ko iya, ‘Nuan enda tau jadi enggau bini menyadi nuan empu!’ Nya alai Herodias pedis ati ngagai John lalu deka munoh iya, tang iya enda ulih munoh John, laban Herod. Nyadi Herod takut ka John laban iya nemu John nya orang ti manah sereta kudus, nya alai iya ngidup ka iya. Herod deka ninga ka John, taja iya selalu kena pangka jako John”

(Mark 6:17-20, Berita Manah Ka Rebak Diatu)

Maya Herod ninga pasal Jesus “ngelekai di serata dunia” (6:14a), iya mikir Jesus tu John laban iya bisi ninga orang bejako, “John Pemaptisa udah angkap idup baru! Nya kebuah kuasa ti baka nya bisi ba iya” (6:14b). Ayat 17 sampai 29 nyerita ka bakani pengujung pengidup John. Bisi tiga orang dalam crita tu ti ulih nyadi ka chunto pengidup kitai Kristian: John, Herod ngau Herodias.

John sigi nabi ti brani ngau bendar. Iya selalu ngajar orang di menua puang, “Lengka ka dosa kita, awak ka kita lalu dibaptisa”. Ko iya mega, “Allah Taala deka ngampun dosa kita” (Mark 1:4). John diguna ka Tuhan “nyadi seruan” ngau “nyedia jalai” ka Tuhan Yesus (1:2). Taja pan John tu kasar dalam jako, iya nabi ti lemi ati. Iya madah ngagai anak murid iya, “[Jesus] deka beguna agi ari aku, lalu aku kurang agi beguna ari iya” (John 3:30). Jesus mega madah bakatu pasal John: “Nadai siko orang ti udah nguan dunya tu lebih besai ari John Pemaptisa…” (Matthew 11:11). Pia mega, John enda malu ngajar Herod, “Nuan enda tau jadi enggau bini menyadi nuan empu!” di mua Herod. Bagi Herod, John tu “orang ti manah sereta kudus.”

Herodias mula iya bini Pilip, tang Herod udah ngambi ka iya nyadi ka bini maya iya nyadi rajah. Herodias tu dibeda aku baka indu tik suka ngambi kesempatan. Iya gila kuasa ngau suka meri perintah ngagai laki iya Herod. John disimpan di rumah pasung (rumah tutup) “laban Herodias” (6:17). Iya amai pedis ati ninga ka jako John, nya alai Herodias ngiga “awak kena munoh John” (6:21). Iya mega indai ti enda peduli bakani orang ngelayan anak dara iya. Maya Herod udah mabuk, iya nyuruh (ko runding aku) anak dara iya betanda di mua Herod enggau pengabang ti datai. Udah Herod betanya ngagai anak dara iya, “Nama utai ti dikedeka nuan?” Anak nya “nanya indai iya, ko iya, ‘Nama utai ti patut dipinta aku?’ Disaut indai iya, ‘Pala John Pemaptisa’” (Mark 6:22, 24). Semoa dendam ngau pemetang ati iya dipuas ka enggau pemati John.

Bisi penyalin madah Herod tu “Rajah”, bisi mega ngumbai iya “Gabenor” (Luke 3:19). Herod tu orang ti bekuasa tang lemi. Iya balat ninga ka jako bini iya ti jai. Herod mega idup dalam pemetang.  Iya “ngereja mayoh macham penyai” ko Luke 3:19. Ati Herod dua tiga, nadai bisi bepanggai dini-dini. Iya rindu ngagai John tang iya mega takut. “Herod deka ninga ka John, taja iya selalu kena pangka jako John” (6:20). Ukai semina ati iya enda tetap, iya mega orang ti enda nemu bepikir maya bejako. Meda anak dara Herodias betanda di mua iya, iya nyadi rindu bendar. Nya alai Herod betanyak nama utai ti dikedeka indu dara nya seta iya besumpah, “Aku besemaya deka meri sebarang utai ti dipinta nuan, datai ka satengah ari menoa ti diperintah aku, deka meh aku meri ka nuan!” (Mark 6:23). Ketegal betanda aja, iya udah bersumpah, besemaya! John mati laban iya takut ka bini, laban malu di moa bala temuai (6:26), ngau laban enda bepikir sebedau bejako.

Kati ko pengidup Kristian nuan? Baka John Pemaptisa ti brani, lemi ati, kudus seta enda malu mantah ka penyai ti dipeda iya? Baka Herodias ti pembenci, suka ngambi kesempatan seta gila kuasa? Baka Herod ti lemi, takut, ati dua tiga serta enda bepikir maya bejako? Nuan deka idup ti ngemesai ka nama Tuhan Yesus baka pengidup John? Tauka nuan deka nyadi orang bekuasa baka Herod ngau Herodias tang pengidup ti ngereja mayoh macham penyai? Dalam crita tu, John ti manah, mati; tang Herod ngau Herodias ti jai, idup. Tang maya tu, John bulih “pengidup ti meruan” (John 3:16); Herod ngau Herodias masuk ka “api neraka” (Luke 16:24).

Sembiang

O Tuhan Jesus, dalam pengidup Kristian kami ajar kami idup dalam jako Nuan.

Awakka kami nitih pengidup John Pemaptisa ti brani, lemi ati, kudus
seta enda malu mantah ka penyai ti dipeda kami. Amen.

THINK BIG. START SMALL. GO DEEP.