Jesus Deka Nulong Kitai Maya 'Ribut', Anang Takut! (Mark 6:45-52)

“Kemaya nya Jesus ngasoh sida murid iya nepan ka dalam perau, lalu mansang ngagai menoa Betsaida, di seberai danau nya, dulu agi ari iya. Nyadi iya tinggal dudi, agi ngasoh orang mayuh pulai. Udai iya beserara enggau sida murid iya, dia iya lalu niki ngagai sigi munggu, besembiang dia. Leboh hari nyau lemai, perau ti dikena sida pen datai di puak danau, leboh Jesus agi tinggal kediri di darat. Iya meda sida murid iya kena penusah nayong ka perau sida, laban sida nanjak ribut. Nya alai kira entara pukol tiga dini hari enggau pukol enam pagi, iya datai ngagai sida, bejalai atas ai. Iya deka bejalai mansa sida”

(Mark 6:45-48, Berita Manah Ka Rebak Diatu)

“Aram kitai bejalai kediri ngagai endor bukai,” ko Tuhan Jesus ngagai sida murid iya, “ngambi ko kitai ulih diau kediri, lalu kita ulih belelak enda lama” (6:31). Tang maya sida udah datai ba endor ti sunyi, sida enda sempat belelak laban mayoh orang datai ngagai sida (6:34). Nyadi, sekali agi Jesus “ngasoh sida murid iya nepan ke dalam perau” awakka sida ulih belelak jauh ari orang mayoh. Jesus tinggal dudi laban Iya “agi ngasoh orang mayoh pulai.” Peda kita dituk, tu meh chunto ketua ti badas. Jesus sinu meda bala murid Iya enggau orang mayuh. Iya nemu sida murid lelak nyadi Iya nyuruh sida pergi dulu; Iya nemu orang mayuh “baka bedus ti nadai orang ngibun” (6:34) nya alai udai Iya meri sida makai Iya kedirik “ngasoh orang mayoh pulai.” Pengerindu ngau pengasih Jesus sigi enda ngira siapa orang nya – murid tauka orang mayuh, nuan tauka aku – tu meh Tuhan di peduli ka kitai!

Tu ti ka ditanya aku: Ukai Simon Peter enggau Andrew sida murid Jesus tu “orang berikan” (1:16)? Ukai James enggau John tu mega orang berikan (1:19)? Sida murid ke lain enda ngawa, tang kati ko sida orang berikan baka Peter, Andrew, James ngau John tau takut maya ribut? Tentu ribut tu ukai ribut ti baka selalu iya. Tu aku deka nanya agi: Apa ‘ribut’ dalam pengidup nuan? Pengarap nuan diuji baka ‘ribut’ nyau nuan takut diatu? Nama utai ti ngachau pengerindu nuan ngagai Allah Taala? Peda kita agi, Jesus peduli ka sida bala murid sampai ka Iya “bejalai atas ai” deka nyelamat ka sida. Ari munggu, Jesus meda sida murid ari jauh ditinggang penusah, Iya datai ngagai sida. “Anang takut!” ko Jesus, “Aku tu, anang takut!” (6:50). Siapa kita ti takut ka antu sitan? Siapa kita ti takut ka penusah? Siapa kita ti mit pengarap? Ko Jesus ngagai kita: Anang takut!

“Udah nya [Jesus] nepan ka dalam perau enggau sida, lalu ribut nadai agi betiup” (6:51). Maya Jesus enggau sida, sida enda pelu takut agi. Samoa tu nadai guna laban Jesus bisi ngau sida. Maya kabut besai datai ngau gelumbang ti kuat datai, Jesus semina bejako, “Anang agi betiup!” “Anang agi mangka!” lalu kabut ngau gelumbang tedoh (Mark 6:37-39). Ukai samoa penanggol tauka penusah kitai deka di-buai Jesus, tang samoa tu deka di-peda kitai mit laban Jesus bekuasa ngau Iya besai agi ari nya. Ko Jesus: “Samoa utai ulih magang, enti orang bisi pengarap” (Mark 9:23). Rasul Paul mega bisi nulis: “Aku bisi pengering kena nangkup samoa macham utai ulih kuasa ti diberi Kristus ngagai aku” (Pilipi 3:13). Jesus peduli, Iya rindu ka kitai samoa. Kuasa Iya ulih ngalah ka ‘ribut’ dalam pengidup kitai.

Anang kitai baka sida murid ti “balat alit ati” ngau “enda ulih mereti ka utai” ti di-gaga Jesus (Mark 6:52). Sida iya “enda nemu reti roti” tauka sida agi nadai pengarap ti bendar enggau Jesus ti ulih meri 5,000 orang makai ngena 5 tuko ikan enggau 2 iko ikan. Jesus ulih nyuman ka mayoh macham penyakit, muai antu, ngasoh kabut tedoh, meri orang mayoh makai, bejalai atas ai, ngau ngasoh ribut badu. Nama ti enda ulih di-gaga Tuhan Jesus? Nadai! “Samoa utai ulih magang,” ko Jesus, “enti orang bisi pengarap… Anang takut!... Aku tu, anang takut!”

Sembiang

O Tuhan Jesus, ‘ribut’ sigi deka nyadi dalam pengidup orang Kristian ti arap ka Nuan.

Maya ‘ribut’ datai dalam pengidup aku, tulong aku enda ngelaban iya kediri.

Ngingat ka aku Nuan selalu ngemata ngau meri pengering ngagai aku.

Beri aku pengarap ti bendar ngagai Nuan, laban Nuan sigi Tuhan ti bekuasa belama-lama iya.

Amen.

THINK BIG. START SMALL. GO DEEP.