Jesus Ngajih Utai Ti Mimit Nyadi Mayoh (Mark 6:34-44)

“Leboh hari nyau lemai, sida murid iya datai ngagai iya, ko sida, ‘Hari tu nyau laun, lalu endor tu mega menoa ti sunyi. Asoh samoa sida aangkat ari endor tu, awak ka sida tau bejalai ngagai kebun enggau tumpok ti semak endor tu, meli barang pemakai ka diri empu.’ Ko Jesus nyaut, ‘Kita empu patut meri sida pemakai.’ Ko sida nanya iya, ‘Kati nuan ngasoh kami nurun meli roti ti be-ungkus dua ratus ringgt, kena meri sida makai?’”
(Mark 6:35-37, Berita Manah Ka Rebak Diatu)

Semoa crita tu bemula ari Jesus laban “iya balat bendar sinu ka sida.” Jesus meda sida lapar ka jako Allah Taala nya alai Iya “ngajar sida mayoh bengkah utai” (6:34). Luke 9:11 madah ka kitai nama ti di-ajar Jesus, Iya “bejako ngagai sida ngenang ka pasal Perintah Allah Taala.” Tang Jesus mega meda sida lapar tubuh ka ke pemakai. Tu nunjok ka kitai Jesus peduli ka roh ngau tubuh kitai. Ukai roh aja, ukai tubuh aja, tang dua-dua skali. Sida ninga ka jako Jesus sampai ka sida enda ingat ka makai. Nama kebuah sida murid Jesus deka nyuruh orang mayuh angkat ari endor nyak? Sida peduli ka orang mayuh? Tauka sida deka belelak diau jauh ari orang mayuh? Enda kitai nemu. Tang Jesus enda ngereja ka utai ti di-asoh sida. Jesus nyuruh sida: “Kita empu patut meri sida pemakai.”

Sida murid Jesus udah meda Iya ngereja mayoh bengkah utai. Jesus udah muru antu (1:21-26), nyuman ka orang ti kena mayoh laban macham penyakit (1:34), nyuman orang ti sakit lan (1:40-44), nyuman orang ti bajong (2:1-12), ngau sida mega udah meda Jesus ngasoh kabut tedoh (4:35-41). Tang sida enda ingat siapa Jesus tu. Sida murid Iya agi mikir, agi enda nemu, agi enda chukup pengarap. Sida enda nemu Jesus ulih nyedia ka semua pemakai orang mayoh. Sida iya meda penusah tu besai amai sampai ka sida enda meda pemesai kuasa Tuhan Jesus. “Nya alai ko Jesus nanya sida, ‘Berapa mayoh roti kita agi tinggal? Uji abas dulu.’ Udah sida nemu pemayoh roti ti agi tinggal, ko sida madah ngagai iya, ‘Lima tuko roti enggau dua iko ikan’” (Mark 6:38). Jesus deka ngaga kereja ajih sekali agi. Sedia?

“Udahnya Jesus ngambi lima tuko roti enggau ikan dua iko, nengkadah ka langit, lalu meri terima kasih ngagai Allah Taala. Iya mechah ka roti nya, nyua ka utai nya ngagai sida murid iya, awak ka sida lalu nyadong roti nya ngagai orang mayoh. Iya mega lalu magi ikan dua iko nya ka samoa sida. Genap iko sida bela makai sereta chukop kenyang. Udah nya sida murid iya mai dua belas iti bakol ti penoh laban laloh roti enggau ikan nya tadi. Pemayoh tuboh sida ti lelaki, ti enggau makai roti nya lima ribu iko.” (Mark 6:39-44). Peda kita, 5 tuko roti + 2 iko ikan = chukop makai 5,000 orang. Ti di kira enggau sida ti indu enggau anak biak ulih sampai 10,000 ka 15,000 orang. Nya pan bisi 12 iti bakol ti penoh ngau laloh roti enggau ikan. Dini semoa utai tu datai? Ari Allah Taala! Mimit lulih nyadi mayoh sampai ka bisi laloh.

Tuhan Jesus ulih ngena utai ti kitai bisi kena ngereja pengawa Iya. Taja pan iya mimit, taja pan iya nadai apa nama, taja pan iya di-peda kitai enda cukup tang laban kuasa Allah Taala Iya ulih ngajih ka utai tauka pengawa kitai nyadi besai seta chukop. Ngambi ka chunto, enti kitai ngerembai ka Jako Injil taja pan mimit, enti kitai bisi pengarap besampi lalu “meri terima kasih ngagai Allah Taala” (6:41), Iya deka ngajih ka pengarap dalam ati orang ti ninga kitai. Kitai meri duit deka nulong orang lain, Tuhan malas kitai enggau belimpah. Ti kitai ngereja pengawa Iya kena meh semoa ti bisi ba kitai – pengering, penemu, duit – awakka Iya ulih nambah nyadi mayoh kali lipat, “sekeda bebuah saratus, sekeda enam puloh sekeda tiga puloh” (Matthew 13:23).

Sembiang

Dalam jari Nuan, O Tuhan Jesus, roti mimit pan nemu nyadi mayoh. Asoh aku arap amat pengawa badas ti mit ti digaga aku ulih ngereja utai ajih dalam ati orang ngena kuasa Nuan. Pia mega, asoh ati aku sinu ngagai orang lain sama baka Nuan sinu ka sida ya mega. Amen.

THINK BIG. START SMALL. GO DEEP.