Jesus Ngirum Kitai Ngerembai ka Injil Enggau Kuasa Iya (Mark 6:6-13)

“Udah nya Jesus bejalai ngagai mayoh bengkah tumpok rumah ti ngelingi endor nya, ngajar orang mayoh. Iya ngangau ka sida murid iya lalu ngator sida bejalai, dua iko begulai. Iya meri sida kuasa kena ngalah ka antu jai…”
(Mark 6:6-7, Berita Manah Ka Rebak Diatu)

Bedau lama bala sida murid Jesus – tauka, bala rasul – begulai enggau Iya, ninga ka jako ajar ngau meda utai ti di adu ka Iya. Sida empai tentu nemu utai ngau agi lemi pengarap. Kati ko Jesus maya nyak ngirum sida ngerembai ka Injil? Ukai penemu ti digiga Allah Taata, ukai pengering ti dipinta Iya. Jesus deka ngena orang ti bepengarap ka Iya, ti ngereja ka pengawa Allah engkau kuasa Iya. Jesus empu ngering sida semoa. Iya meri kuasa ngagai sida rasul, kuasa Allah Taala empu, “Iya meri sida kuasa kena ngalah ka antu jai…”

Dalam runding Tuhan Jesus, pengawa ngerembai ka Berita Manah patut digaga enggau jambat. Tajapan bala sida rasul empai tentu sedia, mengawa tu enda ulih di anti agi. Laban Tuhan Jesus deka ninggal ka sida enda lama agi, nyadi, maya tok meh Iya ngajar ka sida ngerembai ka Injil Tuhan. “Bejalai kita ngagai serata dunya,” ko Jesus dalam Mark 16:15, “lalu tusoi Berita Manah ngagai semoa mensia.”

Sambung: “…lalu ko Jesus bejako enggau sida, ‘Kita anang mai sebarang utai, semina sebatang tungkat aja. Anang mai bekal, anang mai kambut di dikena orang miskin, tauka duit dalam kandi kita. Kena selipar, tang anang ngena baju dalam’” (Mark 6:8-9).

Enda irau nuan macha ka mayoh macham utai ti ditagang Tuhan Jesus ditu? Anang mai sebarang utai, anang mai bekal, kambut, duit ngau ngena baju dalam (anang mai dua bengkah baju ko eti ya). Enti tu pengawa dunya, tentu Jesus enda meri pesan bakatu. Tang tu meh mengawa Allah Taala! Enti Jesus ngirum ka kitai ngerembai ka Injil-Iya, Iya deka meri kitai kuasa ngau deka nyedia ka utai ti dikena kitai. Erti ya: Pengawa Allah Taala mesti bepanggai ba Allah Taala! “Nya alai anang irau, ‘Dini endor aku bulih pemakai? Tauka utai di-irup, tauka gari?’ Apai kita ti di serega nemu kita beguna ka samoa utai nya. Kita patut irau ka Perintah iya enggau samoa utai ti diguna iya, lebih agi ari samoa utai bukai, lalu iya deka meri kita semoa utai bukai” (Matthew 6:31-33). Anang irau! Anang tusah! Anang takut! Ti kitai deka ngereja ka pengawa Allah Taala tentu Iya deka nyukong.

Tang dalam ngereja ka pengawa Iya, bisi mega sida ti enda nerima ka Berita Manah. “Ko iya mega madah ngagai sida, ‘Datai kita ba menoa orang, diau enggau orang ti nerima kita, datai ka kita angkat ari nengeri nya. Enti kita datai ba menoa orang ti enda nerima kita tauka enggai mending ka ajar kita, angkat ari endor nya lalu tesai ka keresik ari tapa kaki kita. Nya deka nyadi ka jako tangkan ngagai sida!” (Mark 6:10-11). Semua utai tu deka nyadi. Bisi orang nerima, bisi ga orang nulak; bisi orang gaga ati, bisi mega orang nadai pengerindu; bisi orang ninggal ka pengidup lama lalu idup baru dalam Jesus Kristus, bisi orang nadai peduli.

Dini Tuhan Jesus udah ngirum ka nuan ngerembai ka Berita Manah? Di tempat keja nuan? Di tempat nuan belaja? Di rumah nuan empu? Di gerija? Enggau kuasa Iya, ngereja meh pengawa tu. Anang irau, Roh Kudus Iya bisi enggau nuan. Anang tusah, Iya deka meri nuan jako Allah Taala. Anang takut, arap ka Iya. Nyadi baka sida bala rasul tu: “Sida angkat lalu ngajar orang, ngasoh orang ngelengka ka dosa sida. Sida muru mayoh antu, lalu ngunsut orang ti sakit ngena minyak sereta nyuman ka sida” (Mark 6:12). Kati ko sida ulih ngaga semoa utai tu? Laban Tuhan Jesus “meri sida kuasa” (6:7).

Sebiang

O Tuhan Jesus, aku amai enda nemu utai; ambik aku ka murid Nuan.

Ajar aku, kering ka aku ngena kuasa Nuan
awakka aku ulih ngerembai ka Berita Manah Nuan. Amen.

THINK BIG. START SMALL. GO DEEP.