Ko Jesus Ngagai Nuan "Pergi Endor Ti Sunyi" (Mark 6:30-34)

Dua bengkah penemu ti aku belajar ari jako Tuhan tu:

#1 Nyimpan ka jako Allah Taala	Setiap kitai mesti bisi Maya Sunyi enggau Tuhan Jesus
#2 Ngereja ka jako Allah Taala	Kitai dikuatka kena melayani

“Sida rasul pulai lalu betemu enggau Jesus. Sida nusoi ngagai iya semoa pengawa ti udah dikereja enggau utai ti udah di-ajar sida. Orang ti datai enggau ti pulai mayoh bendar, nya alai Jesus enggau sida murid iya nadai awak alai makai. Nya alai ko iya bejako enggau sida, ‘Aram kitai bejalai kediri ngagai endor bukai, ngambi ko kitai ulih diau kediri, lalu kita ulik belelak enda lama.’ Nya alai sida lalu merau mansang ngagai endor ti sunyi”
(Mark 6:30-32, Berita Manah Ka Rebak Diatu)

Sida bala rasul baru pulai ari ngereja pengawa ti diasoh Tuhan Jesus. Sida “ngajar orang, ngasoh orang ngelengka ka dosa sida. Sida muru mayoh antu, lalu ngunsut orang ti sakit ngena minyak sereta nyuman ka sida” (Mark 6:12). Maya sida pulai betemu enggau Jesus tentu sida lelak. Taja pan sida lelak tubuh, semengat sida enda lelak. Sida iya amat gaga ati “nusoi ngagai [Jesus] semoa pengawa ti udah dikereja enggau utai ti di-ajar sida.” Aku mikir, mesti Jesus pan sama mega gaga ati. Tang laban sida telalu sibuk sampai “nadai awak alai makai”, Jesus berunding deka mai sida “ngagai endor ti sunyi.”

Kati ko kitai diatu? Nuan kelalu sibok enggau pengawa Tuhan tauka ngereja pengawa dirik empu sampai ka nuan nadai maya sunyi enggau Tuhan? Maya sunyi tu perlu laban dini-dini endor nuan diatu – ba gerija, ba ofis, ba rumah, ba tempat bukai – kitai sibuk lalu nadai ruang deka mikir ka jako Allah Taala ngau bersampi ngagai Tuhan Jesus. Jadual kitai kelalu mayuh sampai baka utai ti nyadi ngagai Jesus enggau bala rasul Iya, “orang ti datai enggau ti pulai mayoh bendar” – enda nemu berenti. Enti kitai terlalu sibok, kitai nadai maya enggau Tuhan. Nya alai kitai mesti bisi maya sunyi kena kitai nyimpan ka jako Allah Taala dalam pengidup kitai.

Macha Bup Kudus, besampi ngagai Tuhan, diau seta ninga ka Roh Kudus. Pergi retreat kediri, niki bukit/gunung, ngagai taman rimba, gerija ti kosong, kediri di library tauka masuk ke dalam bilik, kunci pintu lalu besampi. Kediri tauka enggau orang. Sejam, dua jam, setengah jam tauka 10 minit setiap ari. Anang ngela ka semengat kitai puang, isi iya enggau jako Allah Taala enggau pengerindu serta pengelantang Iya, pengering Iya, penemu Iya lalu enggau peneka Iya.

Lapa kitai mesti bisi Maya Sunyi? Laban leboh Maya Sunyi kitai nyimpan ka jako Allah Taala awakka maya kitai enggau orang lain (maya kitai melayani), kitai ulih ngereja ka jako Allah Taala enggau pengabis ati. Enti kitai nadai maya sunyi, kitai enda bisi semengat ngau kuasa kena melayani. Maya sunyi ngau melayani enda tau ditinggal ka. Tuhan Jesus selalu ngambi maya sunyi enggau Apai diserga (Mark 1:35, Matthew 14:13, John 6:15). Maya sunyi nyediaka ka kitai ngereja pengawa ngagau orang mayoh baka Tuhan Jesus: “Leboh Jesus nurun ari perau, iya meda orang mayoh bendar, lalu ati iya balat bendar sinu ka sida, laban sida baka bedus ti nadai orang ngibun. Nya alai iya ngajar sida mayoh bengkah utai” (Mark 6:34). Nyadi, kitai patut #1 Nyimpan ka jako Allah Taala awakka kitak ulih #2 Ngereja ka jako Iya. Ati ngau pikir kitai mesti di-isi enggau jako seta Roh Tuhan ngambi ka kitai enda lelak tauka lembau tang berapi-api deka melayani orang lain sama baka Jesus.

Sembiang

O Tuhan Jesus, asoh aku ingin ati amat deka belelak enggau Nuan ba endor sunyi,

Ninting ari chukup penglama, ninting taun ba maya ti patut.

Minta Roh Nuan nyimpan ka jako Allah Taala ba ati seta pikir aku,

awakka aku sedia ka sebarang pengawa ti kedeka Nuan. Amen.

THINK BIG. START SMALL. GO DEEP.