Jesus meh Pengangkat enggau Pengidup: "Anang Takut, Arap Aja" (Mark 5:21-42)

“Jairus, siko pemesai ti gawa ba kanisa di menoa nya datai lalu leboh iya meda Jesus iya nyungkor ka diri ba kaki Jesus, lalu bebendar minta kasih ka iya, ko iya, ‘Anak indu aku ti agi biak balat bendar sakit. Aku minta nuan enggau aku, lalu ngengkah ja jari nuan atas iya, awak ka iya tau gerai!’ Udah nya Jesus lalu enggau iya. Orang mayuh bendar nitih ka iya. Laban orang bangat mayoh sida ngenjing bebalut ngelingi Jesus”
(Mark 5:21-24, Berita Manah Ka Rebak Diatu).

Jerita anak indu Jairus tu ngajar kitai ngenang ka pengarap; pengarap ka pengangkat ari pemati. Ketegal pengarap Jairus “nyungkor ka diri ba kaki Jesus.” Iya minta kasih ari Jesus enggau pengabis ati. Maya nya anak iya igi idup. Kati pengarap iya ka Tuhan Jesus chukup kering lepas iya nemu anak iya udah mati? Ko sida ari rumah Jairus, “Anak nuan ti indu udah mati. Nadai guna nuan ngiroh diri mai Pengajar kin” (Mark 5:35). Kati Jairus enda pechaya ka Jesus agi? Maya brita nya pansut, Jesus ngering ka pengarap Jairus, ko Iya, “Anang takut, arap aja.”

Pia ko Tuhan Jesus madah ngagai kitai mega: “Anang takut, arap aja.” Enti kitai udu besampi tang utai ti dipinta kitai enda nyadi baka ti dipinta, anang kitai badu arap ka Tuhan. Enti kitai dituntong penusah, anang badu arap ka Jesus. Enti bisi kaban sabilik mati, anang badu arap ka Tuhan Jesus. Ko Jesus, “Anembiak tu enda mati – semina tindok aja” (Mark 5:39). “Anang takut,” Iya ngering ka pengarap kitai, “arap aja.”

Ba penemu orang ti nadai bepengarap, orang ti udah mati enda tau idup agi belama-lama iya. Tang orang ti bisi pengarap, sigi nemu pemati tuboh kitai semina sementara aja, baka orang ti tindok. Dudi ari ila Tuhan deka ngerak ka kitai baru, lalu kitai deka angkat idup baru. Anang sesekali kitai putus pengarap, bagi kitai orang ti arap ka Tuhan Yesus, kitai patut nemu penusah enggau pemarai enda ulih menang agi – pengidup aja menang! Ketegal siapa? Ketegal Tuhan Jesus Kristus. Iya nyebut: “Aku tu ti pengangkat enggau pengidup. Barang sapa ti arap ka aku deka idup, taja iya mati; lalu barang sapa ti idup lalu arap ka aku – enda tau mati” (John 11:25). Iya mega nyebut: “Anang takut! Aku tu ti terubah enggau ti penudi. Aku meh iya ti idup! Aku udah mati, tang peda diatu aku idup belama-lama. Aku bisi kuasa atas pemati enggau dunya pemati” (Pemandang 1:17-18).

Nya alai, pengarap kitai ti bendar sigi enda tau enda bepanggai ba pengarap ngagai Tuhan Jesus ti ulih ngangkat kitai ari pemati ngagai pengidup ti baru. “Anang takut, arap aja,” ko Iya. Maya Jesus datai ba rumah Jairus, Iya megai jari anembiak nya ti udah mati lalu bejako, ko Iya, “Talitha, kumi!” reti nya, “Endun, angkat nuan!” Kemaya nya anak indu Jairus nya angkat lalu bejalai kia-kia (Mark 5:42). Pia mega, Tuhan deka amat selalu megai jari kitai ti dituntong pemusah, lalu bejako, “Anang takut, arap aja”; “Angkat nuan!”

Sembiang

O Apai kami ti di serga, maya kami dituntong penusah sekalika bisi kaban ti mati, tulong kami enda putus asa. Beri ka pengarap ngagai kami awakka kami enda takut agi. Nyadi meh Pengidup ti meruan dalam kami. Kami pechaya ka Nuan siko aja, Tuhan Jesus Kristus ti pengangkat enggau pengidup dunya. Amen.

THINK BIG. START SMALL. GO DEEP.