Berita Manah: Kubur Udah Puang! Jesus Udah Di-angkat Ari Mati! (John 20)

John pasal 20 tu dibaca ari Berita Manah Ka Rebak Diatu: Sempekat Baru dalam Jako Iban (Iban New Testament, 2nd Edition) ari The Bible Society of Singapore, Malaysia & Brunei, 1981 📖⚡😊 #ServeToLead​ #InjilJohn​ #BeritaManah​#SempekatBaru​

FB Page: https://facebook.com/LEGASI.tv/            

Podcast: https://anchor.fm/LEGASI.tv/            

YouTube: https://www.youtube.com/c/LEGASItv/

THINK BIG. START SMALL. GO DEEP.

Berita Manah: Jesus Meh Jalai, Pemendar enggau Pengidup (John 14)

 

John pasal 14 tu dibaca ari Berita Manah Ka Rebak Diatu: Sempekat Baru dalam Jako Iban (Iban New Testament, 2nd Edition) ari The Bible Society of Singapore, Malaysia & Brunei, 1981 📖⚡😊 #ServeToLead​ #InjilJohn​ #BeritaManah​ #SempekatBaru​

FB Page: https://facebook.com/LEGASI.tv/                
Podcast: https://anchor.fm/LEGASI.tv/            
YouTube: https://www.youtube.com/c/LEGASItv/

THINK BIG. START SMALL. GO DEEP.

Berita Manah: Jesus Ti Pengangkat Enggau Pengidup (John 11)

 

Ko Jesus Kristus bejako enggau Martha, "Aku tu ti pengangkat enggau pengidup. Barang sapa ti arap ka Aku deka idup, taja iya mati; lalu barang sapa ti idup lalu arap ka Aku - enda tau mati. Kati nuan arap ka tu?" "Arap, Tuhan!" ko iya nyaut, "Aku arap ka Nuan ti Mesiah, Anak Allah Taala, ti datai ka dalam dunya tu" 💪⚡🙏 #ServeToLead #InjilJohn #JakoIban #SempekatBaru

FB Page: https://facebook.com/LEGASI.tv/                
Podcast: https://anchor.fm/LEGASI.tv/            
YouTube: https://www.youtube.com/c/LEGASItv/

THINK BIG. START SMALL. GO DEEP.

Berita Manah: Bagi Iya Ti Arap, Ai Idup Deka Lilih Ari Ati Iya (John 7)

 

John pasal 7 tu dibaca ari Berita Manah Ka Rebak Diatu: Sempekat Baru dalam Jako Iban (Iban New Testament, 2nd Edition) ari The Bible Society of Singapore, Malaysia & Brunei, 1981 📖⚡😊 #ServeToLead #InjilJohn #BeritaManah #SempekatBaru

FB Page: https://facebook.com/LEGASI.tv/                 
Podcast: https://anchor.fm/LEGASI.tv/             
YouTube: http://bit.ly/LEGASItv

THINK BIG. START SMALL. GO DEEP.

Berita Manah: Jesus Bisi Jako Ti Meri Pengidup Meruan (John 6)

 

John pasal 6 tu dibaca ari Berita Manah Ka Rebak Diatu: Sempekat Baru dalam Jako Iban (Iban New Testament, 2nd Edition) ari The Bible Society of Singapore, Malaysia & Brunei, 1981 📖⚡😊 #ServeToLead #InjilJohn #BeritaManah #SempekatBaru 

FB Page: https://facebook.com/LEGASI.tv/                 
Podcast: https://anchor.fm/LEGASI.tv/             
YouTube: http://bit.ly/LEGASItv

THINK BIG. START SMALL. GO DEEP.

Jesus, Mesiah Orang Israel tang Indu Orang Siria Bisi Bepengarap ti Besai ka Iya (Mark 7:24-30)

“Udah nya Jesus angkat lalu mansang ngagai sabengkah endor ti semak nengeri Tire. Iya belalai, tama ngagai sabuah rumah, enggai ka orang nemu iya bisi dia. Tang Iya enda ulih ngelalai ka diri. Siko indai orang ti bisi anak indu kena rasok antu, nemu Jesus bisi dia. Iya datai ngagai Jesus lalu nyungkor ka diri di kaki iya. Indu nya orang bansa bukai, iya ada di Penisia, dalam menoa Siria. Iya minta Jesus muru antu ari anak indu iya”

(Mark 7:24-26, Berita Manah Ka Rebak Diatu)

Jesus baru badu bejako enggau sida bala Parisi pasal “ajar aki ini sida” (7:2). Sida enda nerima jako ajar Jesus, nya alai Iya bepindah ngagai menoa orang kapir, menua ukai orang Judah. Dia siko indu bansa ari Siria datai ngagai Jesus lalu kran minta tulong Jesus muru antu ari anak indu iya. Tang saut Jesus, “Awak ka kita meri anak mit makai dulu. Enda patut kitai ngambi pemakai anak mit lalu meri iya ngagai ukoi” (7:27). Tu mina jako sempama, tang nama kabuah Jesus dipeda kitai nulak ka pinta indu nya enggau jako ti kasar?

Kitai enda tau enda mereti, Jesus semina ngena jako orang Israel ti ngumbai sida bansa bukai baka “ukoi” (orang Judah meda dirik sida baka “anak mit”. Tu pemikir ti jai ti salah ari orang Israel). Orang Israel pechaya Allah Taala deka ngirum ke Mesiah (tauka Kristus) ngagai sida nitih ja jako Jesus, “Aku semina di-asoh ngiga raban bedus orang Israel ti lenyau” (Matthew 15:24). Tang nya enda bemaksud Jesus enda kasih ka orang bansa bukai. Iya datai ngagai orang Israel labah sida tu bansa ti dipilih Allah Taala. Ngagai bansa Israel dulu baru nya bansa lain. Kitai patut mereti iya nya Jesus enda ba Israel aja tang “ngagai nengeri bukai mega, laban nya kebuah Allah Taala ngasoh [Iya] datai” (Luke 4:43). Jesus datai dulu ka orang Israel tang Iya deka mati ka dosa semoa mensia. Iya deka nyadi Pengelepas semoa mensia! “Bejalai kita ngagai serata dunya lalu tusoi Berita Manah ngagai semoa mensia,” ko Jesus di ujong injil Mark (16:15).

Indu nya mereti ka jako Jesus tang iya amat liat ati bepengarap besai. “Ko indu nya nyaut iya, ‘Nya amat, tuan. Tang ukoi ti di baroh mija mega makai teda pemakai ti enda abis dempa anak mit!’ Nya alai ko Jesus bejako enggau iya, ‘Kategal saut nuan baka nya, nuan tau pulai ke rumah. Antu udah pansut ari anak nuan!’” (Mark 7:28-29). Indu nya enda malu dikumbai “ukoi”; iya nadai sekali-kali putus ati; iya kran minta enggau pengeliat ati. Laban iya kasih ngagai anak iya ngau pechaya bendar ngagai Jesus, iya “pulai ka rumah lalu nemu anak iya gali ba penindok. Antu amat udah pansut ari iya” (7:30). Matthew 15:28 bisi nambah ka jako Jesus, “Nuan tu indu ti besai pengarap!” Kati ko indu ari bansa kapir, bansa Siria bisi pengarap besai ngagai Jesus, Mesiah orang Israel? Amai besai pengarap iya! Kitai mega – orang Iban – bansa bukai. Bisi kitai pengarap baka indu nya?

O Tuhan Jesus, aku meri trima kasih ngagai Nuan laban nuan udah nyadi Pengelepas aku.

Aku minta ka pengarap aku ka Nuan sama sabaka indu ti dalam Mark 7 tu.

Nuan meh Tuhan aku, Nuan meh Mesiah (Kristus) aku, Nuan meh ti bekuasa dalam pengidup aku.

Aku minta Nuan meri pengarap aku besai agi.

Amen

THINK BIG. START SMALL. GO DEEP.

Anang Semina Deka Dikumbai Orang Kudus Tang Ngelengka ka Ajar Allah Taala (Mark 7:9-13)

“Lalu ko Jesus nampong jako iya, ‘Kita pintar bendar, kebuah kita enda nerima adat Allah Taala, awak ka kita ulih ngemansang ka ajar kita empu. Ko ajar Moses, ‘Bebasa ka apai indai kita,’ lalu ‘sebarang sapa nyebut utai jai pasal apai tauka indai iya, enda tau enda kena bunoh.’ Tang kita ngumbai enti orang bisi utai ti tau dikena nulong apai tauka indai iya, ‘Tu Piring’ (reti nya tu enggi Allah Taala), nya alai iya tau enda iboh nulong apai tauka indai iya. Ngena jalai nya kita enda iboh ka ajar Allah Taala lalu nitih ka penemu ti di-ajar kita ngagai orang bukai. Agi mayoh utai bukai ti baka nya digaga kita”
(Mark 7:9-13, Berita Manah Ka Rebak Baru)

Jesus nyaut sida orang Parisi: “Kita ngelengka ka pesan Allah Taala, lalu nitih ka utai ti di-ajar mensia” (Mark 7:8). Ditu Jesus meri chunto sida ngajar adat mensia lebih besai agi ari pesan Allah Taala. Ko Iya, “Kita pintar bendar…” Tu ukai jako muji sida tang tu jako ngelese ka sida. Sida ngumbai sida pintar? Paul udah nulis: “Utai ti dikumbai dunya tu bepenemu nya nadai guna sakali di moa Allah Taala” (1Korint 3:19). Bisi kebuah sida nambah ka pesan Allah Taala, meri undang-undang ti mayoh, undang-undang ti berat ngagai orang – sida deka “ngemansang ka ajar” sida empu: adat mensia. Awak ka orang betuan ka sida ukai Allah Taala. Awak ka sida bepengaroh ngau bisi kuasa kena ngekang orang mayoh.

Ko jako Allah Taala diberi ngagai Moses: “Bebasa ka apai indai kita… sebarang sapa nyebut utai jai pasal apai tauka indai iya, enda tau enda kena bunoh.” Tang sida orang Parisi ngau bala pengajar Adat udah ngaga undang-undang kediri ti bingkok awak ka sida enda iboh meri utai ngagai apai indai sida. Ko sida, “Aku enda ulih nulong apai indai laban semoa utai aku udah enggi Allah Taala, nyadi Piring (tauka korban).” “Semua utai diserah kena ngereja pengawa Allah Taala”, ko sida, munyi baka orang Kudus. Laban sida orang ti bepengaroh ba rumah Allah, sida tau mega ngena utainya kena diri empu. “Tu Piring” ko sida awak ka orang ngumbai sida orang kudus, orang alim. Tang ti ke-amai iya sida enggai nulong apai indai. Sida deka ngena utai tauka duit sida kena dirik empu aja. Sida ngelengka pesan besai iya nya “Nuan enda tau enda rindu ka orang bukai” (Mark 12:31) nyadi “rindu ka diri empu” aja.

Orang Parisi mina peduli ngau meda utai ti di-luar aja (Mark 7:6-8). Tuhan Jesus – Guru ti Badas – deka meda ati kitai orang Kristian. Pengerindu Allah Taala enda bepanggai enggau utai ti di-luar baka jari ti kamah tauka enda (Mark 7:1-5), tang Iya meda ati kitai kudus tauka bedosa. Maya tu mayoh orang nyangka pengarap orang Kristian tu semina utai ti di-luar aja baka undang-undang grija ngau Adat mensia (bisi ngagai grija ari Minggu ka enda? Ngaga tanda regang ka enda? Bisi meri ngagai grija ka enda?). Tang pengarap kitai tu semoa iya terlebih dulu ari dalam ati kitai. (Bisi pengarap ngagai Allah Taala ka enda? Roh Kudus bisi tinggal dalam ati ka enda? Dosa udah diberesi enggau darah tuchi Jesus ka enda?). “Aku enda ngira mensia ngena chara mensia,” ko TUHAN, “Mensia meda gamal, tang Aku meda ati” (1 Samuel 16:7).

O Tuhan Jesus, aku enggai dikumbai orang Kudus tang ati aku jauh ari Nuan.

La aku merisa ati aku: Bisi pengasih Nuan tauka nadai?

Ngereja ka ajar Nuan tauka ngelengka ka iya?

Nitih pesan Allah Taala tauka agi bepegai ba ajar mensia?

Perisa ati aku Tuhan, tuchi ka meh iya ngena darah tuchi Nuan. Tu sampi aku. Amen.

THINK BIG. START SMALL. GO DEEP.

Jesus Enda Ulih Ngereja Kereja Ajih enti Nuan Nadai Pengarap (Mark 6:1-6)

“Jesus angkat ari endur nya lalu pulai baru ngagai menua Iya empu [Nasaret], lalu sida murid Iya nitihka Iya. Lebuh hari Sabat, Iya belabuh ngajar dalam balai gempuru, lalu mayuh orang alit ati ninga Iya. Ku sida, ‘Dini alai orang tu bulih semua utai tu? Nama penemu-dalam tu ti udah diberi ngagai Iya? Nama kereja ajih ti benung dikereja Iya tu?’”
(Mark 6:1-2, Bup Kudus Baru).

Tuhan Jesus datai ba menua Iya empu, iya nya Nasaret. Empai lama dulu ari nya, Iya udah nyuman ka siko indu ti sakit begetah dua belas taun. Iya mega udah ngangkat ka anak indu Jairus ari pemati (bacha Mark 5:21-43). Semoa sida tu bisi ngasai ka kuasa Tuhan Jesus – Mesiah serta Anak Allah Taala – laban sida bisi pengarap ngagai Iya. Tang sida orang Nasaret tu enda arap ka Iya. Sida mega enda arap ka Jesus nya nabi orang Israel. Lapa? Laban sida teleba meda Iya ari mit. “Iya tu tukang kayu, anak Maria, menyadi James, Joses, Judas, enggau Simon”* (ayat 3) ko sida. “Sida lalu nulak Iya.”

Menyadi* ti disebut ditu ukai menyadi amat Jesus, tang petungal Iya. Kaban belayan suah dikumbai menyadi taja sida ukai menyadi ari apai enggau indai ti sama. Semua orang diada ari apai indai, tang Jesus diadaka Maria ngenak kuasa Roh Kudus laban Iya “Anak Allah Taala” (Luke 1:35)

Yesus alit ati meda sida ti enda arap ka Iya. Lalu Jesus bejaku ngagai sida, “Nabi endang dibasa orang, kelimpah ari di menua iya empu, enggau ba bala kaban belayan iya empu, enggau dalam rumah iya empu” (Mark 6:4). Jesus sinu. “Iya enda ulih ngereja kereja ajih dia, kelimpah ari ngengkahka jari atas dua tiga iku orang ke sakit, lalu ngeraika sida” (ayat 5). Enti nadai pengarap, Jesus enda ngaga kereja ajih. Ukai Iya enda nemu tauka nadai kuasa, tang Iya nemu semua nya nadai reti bagi sida enti sida enda arap ka Iya. Kereja ajih dipeda sida baka main silap mata tauka kereja antu; ukai kereja Mesiah, Anak Allah Taala ti besai kuasa. Nadai guna ngaga kereja ajih enti sida iya udah netap ka ati enda pechaya ka Iya. Jesus “balat ati ke penadai pengarap sida” (ayat 6).

Ditu kitai meda takah jauh hubungan Jesus enggau sida kaban belayan Iya ba menua Iya empu – jauh amat – laban sida enggai arap ka Iya. Jesus deka ngagai semak sida, tang sida nulak Iya jauh. Jesus rindu deka begulai enggau sida, tang sida nutup ati sida. Jesus ka amat ngaga kereja ajih – maya nya pun Iya deka – tang sida nadai pengarap.

Kati ko nuan? Bisi nuan pengarap ti amat ngagai Tuhan Jesus? Deka nuan nyadi menyadi Iya ti pechaya ka Iya? Jesus bisi bejaku: “Sapa indai Aku? Sapa menyadi Aku?... Tu meh indai Aku enggau menyadi Aku! Barang sapa ngereja peneka Allah Taala, nya meh menyadi lelaki, menyadi indu, enggau indai Aku” (Mark 3:33-34). Nama peneka Allah Taala nya? Peneka Iya awakka nuan enggau aku arap ka Tuhan Jesus Kristus, Anak Allah Taala. Nuan mesti tetap arap taja pan bala kaban belayan nuan dudi ari ila enda. Bisi maya iya nuan mesti ngenjauh ka diri ari sida ti enda arap awakka nuan ulih semak agi ngagai Tuhan Jesus. Tetap arap, lalu nuan deka meda Iya ngereja kereja ajih dalam pengidup nuan.

Sembiang

Tuhan Jesus, Nuan meh Raja enggau Penebus aku. Aku deka selalu arap ka Nuan. Aku deka arap taja pan (bisi maya iya ila) pangan aku tauka kaban belayan aku badu nitih Nuan. Tulong meh aku, awakka aku ulih nulong orang lain ti sama bisi penusah baka aku mega. Aku deka arap ka Nuan, tambah ka pengarap aku tiap ari. Amen.

THINK BIG. START SMALL. GO DEEP.

Jesus meh Pengangkat enggau Pengidup: "Anang Takut, Arap Aja" (Mark 5:21-42)

“Jairus, siko pemesai ti gawa ba kanisa di menoa nya datai lalu leboh iya meda Jesus iya nyungkor ka diri ba kaki Jesus, lalu bebendar minta kasih ka iya, ko iya, ‘Anak indu aku ti agi biak balat bendar sakit. Aku minta nuan enggau aku, lalu ngengkah ja jari nuan atas iya, awak ka iya tau gerai!’ Udah nya Jesus lalu enggau iya. Orang mayuh bendar nitih ka iya. Laban orang bangat mayoh sida ngenjing bebalut ngelingi Jesus”
(Mark 5:21-24, Berita Manah Ka Rebak Diatu).

Jerita anak indu Jairus tu ngajar kitai ngenang ka pengarap; pengarap ka pengangkat ari pemati. Ketegal pengarap Jairus “nyungkor ka diri ba kaki Jesus.” Iya minta kasih ari Jesus enggau pengabis ati. Maya nya anak iya igi idup. Kati pengarap iya ka Tuhan Jesus chukup kering lepas iya nemu anak iya udah mati? Ko sida ari rumah Jairus, “Anak nuan ti indu udah mati. Nadai guna nuan ngiroh diri mai Pengajar kin” (Mark 5:35). Kati Jairus enda pechaya ka Jesus agi? Maya brita nya pansut, Jesus ngering ka pengarap Jairus, ko Iya, “Anang takut, arap aja.”

Pia ko Tuhan Jesus madah ngagai kitai mega: “Anang takut, arap aja.” Enti kitai udu besampi tang utai ti dipinta kitai enda nyadi baka ti dipinta, anang kitai badu arap ka Tuhan. Enti kitai dituntong penusah, anang badu arap ka Jesus. Enti bisi kaban sabilik mati, anang badu arap ka Tuhan Jesus. Ko Jesus, “Anembiak tu enda mati – semina tindok aja” (Mark 5:39). “Anang takut,” Iya ngering ka pengarap kitai, “arap aja.”

Ba penemu orang ti nadai bepengarap, orang ti udah mati enda tau idup agi belama-lama iya. Tang orang ti bisi pengarap, sigi nemu pemati tuboh kitai semina sementara aja, baka orang ti tindok. Dudi ari ila Tuhan deka ngerak ka kitai baru, lalu kitai deka angkat idup baru. Anang sesekali kitai putus pengarap, bagi kitai orang ti arap ka Tuhan Yesus, kitai patut nemu penusah enggau pemarai enda ulih menang agi – pengidup aja menang! Ketegal siapa? Ketegal Tuhan Jesus Kristus. Iya nyebut: “Aku tu ti pengangkat enggau pengidup. Barang sapa ti arap ka aku deka idup, taja iya mati; lalu barang sapa ti idup lalu arap ka aku – enda tau mati” (John 11:25). Iya mega nyebut: “Anang takut! Aku tu ti terubah enggau ti penudi. Aku meh iya ti idup! Aku udah mati, tang peda diatu aku idup belama-lama. Aku bisi kuasa atas pemati enggau dunya pemati” (Pemandang 1:17-18).

Nya alai, pengarap kitai ti bendar sigi enda tau enda bepanggai ba pengarap ngagai Tuhan Jesus ti ulih ngangkat kitai ari pemati ngagai pengidup ti baru. “Anang takut, arap aja,” ko Iya. Maya Jesus datai ba rumah Jairus, Iya megai jari anembiak nya ti udah mati lalu bejako, ko Iya, “Talitha, kumi!” reti nya, “Endun, angkat nuan!” Kemaya nya anak indu Jairus nya angkat lalu bejalai kia-kia (Mark 5:42). Pia mega, Tuhan deka amat selalu megai jari kitai ti dituntong pemusah, lalu bejako, “Anang takut, arap aja”; “Angkat nuan!”

Sembiang

O Apai kami ti di serga, maya kami dituntong penusah sekalika bisi kaban ti mati, tulong kami enda putus asa. Beri ka pengarap ngagai kami awakka kami enda takut agi. Nyadi meh Pengidup ti meruan dalam kami. Kami pechaya ka Nuan siko aja, Tuhan Jesus Kristus ti pengangkat enggau pengidup dunya. Amen.

THINK BIG. START SMALL. GO DEEP.

Jesus, Penyelamat Kitai: Ukai Ketegal Baju Iya, tang Pengarap Nuan (Mark 5:25-34)

“Nyadi dia bisi siku indu ke udah sakit begetah dua belas taun. Iya udah berubat ngagai mayuh bengkah lutur. Tang sida enda ulih ngeraika iya. Semua duit iya nyau abis kena iya berubat, tang iya nadai belinsur gerai, tang majak balat-sebalat sakit. Iya udah ninga pasal Jesus. Iya lalu datai ari belakang Jesus dalam tekang bala mayuh, lalu negu baju Jesus, laban ku iya bejaku dalam ati diri, ‘Enti aku negu baju Iya, aku deka gerai.’ Iya lalu tekala nya badu agi begetah, lalu iya ngasaika tubuh diri udah digeraika ari penyakit nya. Jesus lalu tekala nya nemu kuasa bisi udah pansut ari Iya. Iya lalu nguing ngagai tekang bala mayuh lalu bejaku, ‘Sapa negu baju Aku?’ Sida murid Iya lalu bejaku ngagai Iya, ‘Peda Nuan pemayuh orang besedul ngelingi Nuan, lalu agi ga Nuan nanya, ‘Sapa negu Aku?” Jesus majak gining-gining ngiga orang ke udah negu Iya. Tang lebuh indu nya nemu utai bisi udah nyadi ba iya, iya datai, getar-getar takut, besugang di kaki Jesus lalu madah ngagai Iya semua utai ti udah nyadi. Jesus lalu bejaku ngagai iya, ‘Anak, pengarap nuan udah ngeraika nuan. Mupuk meh nuan enggau selamat. Nuan udah gerai ari penyakit nuan’’
(Mark 5:25-34, Bup Kudus Baru)

Indu nya bisi sakit begetah (tauka penyakit pansut darah) udah 12 taun. Taja pan iya nadai dibri nama, iya nyadi ka chunto ngagai kitai ketegal pengarap ia ti besai ngagai kuasa Tuhan Jesus Kristus. Ko iya berunding dalam ati: “Enti aku negu baju Iya, aku deka gerai.” Tu pengarap ti besai! Enda iboh mayoh macham pengawa serta jako. Enda iboh besampi panjai tauka bebunga-bunga. Iya semina “negu baju Jesus” lalu iya gerai! Tekala nya Tuhan Jesus nemu kuasa Allah Taala bisi udah pansut ari Iya ngerai ka indu nya.

Jerita tu tau tembu ditu.

Tang enda.

Tuhan Jesus “majak gining-gining ngiga orang ke udah negu Iya. Tang lebuh indu nya nemu utai bisi udah nyadi ba iya, iya datai, getar-getar takut, besugang di kaki Jesus lalu madah ngagai Iya semua utai ti udah nyadi.” Jesus lalu bejako enggau iya: "Anak, pengarap nuan udah ngeraika nuan.” Nama kebuah Tuhan Jesus ngasoh iya mantai pengawa tu di moa orang mayuh, lalu baka ngemalu ka indu tu?

Laban indu nya deka belalai. Kitai enda tau baka nya. Pengarap kitai ngagai Tuhan Jesus enggau kuasa Iya enda patut dipelalai dalam ati kitai aja belama-lama lalu enda ditusoi ngagai orang bukai (Indu tu belalai tang Jesus deka iya ngaku dimoa orang mayuh). Pengarap tu ukai baka padi ti disimpan dalam tajau lalu enda dikeluarka agi. Enti pia, iya deka bau akap. Manah agi iya ditanam baru iya mai penguntong serta bebuah. Baka nya mega pengarap kitai. Kitai mesti ngaku ka iya, madah ngagai orang mayuh, tusoi enggau ati ti gaga laban Tuhan Jesus udah ngerai ka nuan enggau aku. Lak ka pengarap ditanam dalam ati orang lain mega lalu bebuah nitih ka peneka Allah Taala.

Makin tua ngemesai ka nama Tuhan Jesus ti nyelamat ka kitai, makin mansang besai pengarap tua ngagai Iya. Pengarap kitai enda patut dipelalai, iya mesti dibrita ka ngagai orang mayuh awakka sida mega dibai kitai bendar agi arap ka Tuhan Jesus ti Penyelamat kitai. Ko Saint Paul dalam surat iya ngagai orang di Rome: “[Kami] arap dalam ati kami lalu digaga lurus di moa Allah Taala; kami ngaku enggau mulut kami lalu idup” (Rome 10:10). Tuhan Jesus empu meda udah bejako: “Bejalai kita ngagai serata dunya, lalu tusui Berita Manah ngagai semua mensia” (Mark 16:15). Nama Berita Manah tu? Ia nya Tuhan Jesus empu. Anang ngelalai ka pengawa Tuhan ba pengidup nuan. Selalu deka nusoi ka Berita Manah ngagai orang bukai. Anang takut.

Sembiang

O Tuhan Jesus, udah mayoh kali Nuan mantai ka pengerindu Nuan, kuasa Nuan enggau penyuman Nuan ngagai aku. Patut amai aku magi ka penemu nya ngagai orang bukai, ngambi ka sida enggau aku sama bela mansang dalam pengarap ka Nuan ti Penyelamat dunya. Amen.

THINK BIG. START SMALL. GO DEEP.

Jesus, Anak Allah Taala: Antu Sitan Besugang di Mua Iya (Mark 5:1-20)

“Lebuh Jesus angkat ari perau lalu niki ke tebing, siku orang ke dirasuk antu lalu tekala nya pansut ari pendam lalu mansang ngagai Iya. Orang nya diau ba sebelah pendam, lalu nadai orang ulih masung iya; ngena rantai pen enda meh ulih, laban iya suah udah ditanchang ngena rantai lalu dikunchi, tang iya mutuska rantai lalu mechahka kunchi nya, lalu nadai orang ulih merekuhka iya. Siang malam iya bejalai segau-segau ba sebelah pendam, enggau ba sebelah bukit, rauh-rauh sereta ngurik diri ngena batu. Lebuh iya tepedaka Jesus ari jauh, iya belanda lalu meremi di mua Jesus, lalu manjung enggau pengabis penginggar nyawa iya. Ku iya, ‘Nama utai ti deka dikereja Nuan ba aku, Jesus, Anak Allah Taala ti Pemadu Tinggi? Dalam nama Allah Taala, anang merinsaka aku!’”
(Mark 5:1-7, Bup Kudus Baru).

Nyelai amat cherita tu, pasal Jesus ngeraika orang ke dirasuk antu. Amat kering serta bekuasa antu nya; bala antu ti diketuai antu Sitan! Bakani gamal antu Sitan? Kati Allah Taala ngaga antu? Lapa Iya ngaga utai ti jai baka nya? Ukai Allah Taala ngaga sida jai baka nya. Terubah iya, Tuhan ngaga mayoh amat roh ti badas serta besai agi kuasa ari mensia. Roh tu dikumbai Bup Kudus – Melikat. Allah Taala nya pengerindu, nya alai Iya enggai maksa sida rindu ka Iya lalu ngasi ka Iya. Iya meri ka sida peneka diri empu awak ka sida rindu ka Iya ari peneka diri empu. Tang sekeda bala melikat dulu kelia nyau besai ati lalu enggai ngasi ka jaku Allah Taala. Sida deka nyadi besai agi ari Tuhan, lalu ketegal nya sida nyadi antu-antu jai ti diketuai Antu Sitan. Baka melikat, sida udu pintar lalu besai kuasa, tang kelalu jai.

Maya Tuhan Jesus diau di dunya, sida antu tu udu ngachau mensia laban Jesus bedau parai ngelepaska kitai ari dosa serta kuasa Sitan. Enggau pemarai Iya (lalu angkat ari mati) Jesus “nanchang [Sitan] ke kering nya” (Mark 3:27). Amat jarang mensia dirasuk antu abis lengis baka orang dalam Mark 5:1-20 tu. Dalam cherita tu, pengawa antu Sitan dipeda kitai suka ngachau serta ngerusak mensia. Macham-macham ti digaga sida ngagai kitai mensia: 1) Iya ngiga peluang ngachau untak serta penemu kitai awakka kitai charut serta enda nemu jalai Allah Taala agi tang gila ka utai didunya tu aja; 2) Iya ka ngachau ati, ngasoh kitai badu lantang lalu takut aja; 3) Iya ka ngachau semengat, awakka kitai slalu ngenangka penyalah serta dosa diri lalu enda ingat ka penebus darah Tuhan Jesus ka kitai; 4) Iya ka ngachau tuboh, ngasoh kitai sakit baka orang ti dirasuk antu tu. Iya “ngurik diri ngena batu” (Mark 5:5); 5) Iya ka ngachau semoa utai didunya tu mega baka iya tama ngagai babi “lalu belanda nurun tingkah ngagai danau, lalu lemas” (5:13).

Taja pan kuasa iya udah dialahka Tuhan Jesus di kayu regang, bala antu Sitan agi megai dunya tu. Sida agi bekuasa sampai Tuhan Jesus datai ke dunya ke dua kali iya, baru sida antu Sitan dibuai ke api neraka belama-lama iya. Nyak alai maya sida di mua Tuhan Jesus, sida enda tau enda besugang di mua Iya! Sida nemu siapa Tuhan Jesus tu, iya nya: “Anak Allah Taala ti Pemadu Tinggi!” Jesus jauh besai agi lalu tinggi agi kuasa ari sida semoa. Semoa rantai didunya tu enda ulih nanchang Sitan; tang seleka jaku Jesus umbas ngasoh Sitan ngasika Iya lalu pansut ari orang ti dirasuk antu [Jesus bejaku ngagai antu nya, “Pansut nuan ari orang tu, nuan roh ti jai!” (Mark 5:8)]. Jesus meh Tuhan atas penyakit; Tuhan atas hari Sabat; Tuhan atas kabut serta gelumbang; Tuhan atas semoa roh-roh didunya, serga serta neraka (semoa tu ulih dibacha kitai ari Injil St. Mark).

Enti kitai arap amat ka Iya, kuasa Iya enggi kitai mega. Antu Sitan nadai kuasa ngagai kitai; kitai ulih ngalahka iya enggau pengarap serta kuasa Tuhan Jesus. Kitai udah menang laban Tuhan Jesus Kristus dalam pengidup kitai!

Sembiang

Tuhan Jesus ti besai kuasa, Sitan agi mayoh jalai ngachau tuboh, ati enggau runding aku awakka charut lalu enda mikirka Nuan. Aku besampi awakka aku tetap arap ka Nuan aja. Jesus, nyadi meh Tuhan dalam tuboh serta semengat aku. Nuan idup lalu merintah dalam aku belama-lama iya. Amen.

THINK BIG. START SMALL. GO DEEP.

Jesus deka Nuan Nyadi Rasul Merita Ka InjiI-Iya Ba Endor Nuan Diatu

“Udah nya Jesus niki ka munggu, lalu ngumbai orang ti dikedeka iya. Sida datai ngagai iya, lalu iya milih dua belas iko ari sida, di-asoh iya nyadi rasul. Ko iya, ‘Aku udah milih kita awak ka kita enggau Aku. Aku mega deka ngasoh kita ngajar, lalu kita mega bisi kuasa kena muru antu’”

(Mark 3:13-15, Berita Manah Ka Rebak Diatu)

Mayoh amai orang “ti sakit majak ka diri mansang ngagai [Jesus] awak ka tau negu iya” (ayat 10). Bakani siko orang aja ulih nulong orang mayoh? Nya alai Jesus milih 12 iko orang ari bala murid ti ulih nulong Iya. Sida tu dikumbai Iya “rasul” tauka “apostle,” reti nya “orang ti dikirum.” Sida dipilih Iya lalu dikirum Iya merita ka Injil Berita Manah serta ngajar ngau muru antu.

Nama kabuah 12? Laban 12 enda mimit enda mayoh. 12 nyamai agi Jesus ulih ngajar sida enggau semak agi. Ngau 12 sama enggau 12 iko anak Jakob ti aki-ini 12 raban bansa Israel kelia – bansa ti dipilih Allah Taala. Sida tu meh rasul ti dipilih Jesus mega. Diatu Allah Taala ka milih ukai bansa Israel aja tang samoa bansa disebelah dunya ti deka nitih ka perintah Allah Taala. Nya meh Gereja. Lalu 12 rasul Jesus tu nyadi aki-ini Gereja terubah kelia – 12 tiang pemun gereja.

Ke terubah ya Tuai bala rasul, ia nya Simon ti digelar Peter tauka Petrus (reti nya “batu”) meh orang ti selalu bejako dulok baru berunding. Ia meh orang di keterubah ya ngako Jesus “Mesiah, Anak Allah Taala” tang udah nya orang tu enda ngako Jesus Guru iya. John saduai James, ngambi ka chunto, digelar Jesus “Boanerges” tauka “Bujang Guntor” laban sida udu jampat angat ati. Sedua keran amat ka ngasoh Allah Taala ngerusak orang ti ngelaban Jesus (peda Luke 9:54). Pia meh samoa Rasul bisi perangai diri empu ti enda sebaka, lalu perangi ti enda tentu. Tang mupok-mupok Jesus ngubah sida.

Baka nya meh samoa orang ti nyadi anembiak Jesus seudah bala Rasul, ia nya semoa orang Kristian, lebih-lebih agi sida ti nyadi ketuai kitai. Sida – lebih-lebih agi sida ti begawa di gereja ngau NGO Kristian bukai – bisi pengelemi serta perangi ti enda tentu, laban sida mensia baka orang bukai mega. Anang mantah aja tang muji Allah Taala laban Perintah Allah Taala mansang lalu datai ngagai kitai siko-siko, ari orang-orang Kristian ngagai orang ti deka ngelala Iya. Allah Taala deka ngena kitai mensia, iya nya pekakas ti lemi ti di kering ka Iya. Iya deka ngubah kitai enti kitai arap ka Iya. Tang bisi siko ari Rasul mungkir lalu mudi Jesus iya nya Judas, siko ari 12 Rasul. Pia mega diatu: anang irau enti bisi ketuai-ketuai ti mungkir. Anang ati kitai kurang arap ka samoa orang Kristian laban bisi hal baka nya.

Tuhan Jesus sigi menang enggau Perintah Iya. Iya sampai diatu di tengah Gereja – iya nya semoa kitai orang Kristian – lalu deka agi ngena ketuai-ketuai tauka orang ti biasa, lelaki tauka indu, ngereja pengawa Iya. Iya diatu agi “ngirum” sida ngereja pengawa bala Rasul: “Aku udah milih kita awak ka kita enggau Aku. Aku mega deka ngasoh kita ngajar, lalu kita mega bisi kuasa kena muru antu” (Mark 3:14-15). Uji nuan bepikir bendar-bendar: bakani diatu Jesus ngirum nuan nyadi rasul Iya?

Sembiang

Aku nyerah diri ngagai Nuan, Tuhan Jesus. Kirum aku mega nyadi rasul Nuan ka sida ti kedeka Nuan, ba sebarang endor, barang gaya ti kedeka Nuan. Lantang ati aku ka nulong Nuan merita Injil, enggau penulong enggau kuasa Roh Kudus Nuan. Amen.

THINK BIG. START SMALL. GO DEEP.

Jesus Deka Meri Kitai Ai Anggor Baru (Pesan Baru) ngau Kambut Kulit Baru (Pendiau Baru)

Kambut kena nyimpan ai anggor dulu kelia

“Nyadi sakali, sida murid John Pemaptisa enggau orang Parisi bepasa. Sekeda orang datai ngagai Jesus lalu nanya iya, ‘Nama kebuah bala murid John Pemaptisa enggau orang Parisi bepasa, tang bala murid nuan enda?’ Ko saut Jesus, ‘Kati dalam runding kita, orang ti ngabang ngagai orang ti nikah tau enda makai? Tentu enda! Sagi-agi iya ti baru bebini nya bisi enggau sida, sida tentu enda ngereja utai nya. Tang timpoh deka datai endor iya ti bebini nya deka angkat ninggal ka sida. Leboh hari nya datai, sida nadai pemakai’”
(Mark 2:18-20, Berita Manah ka Rebak Diatu).

Murid John Pemaptisa enggau bala Parisi suah bepasa. Ngayah tuboh diri, debu engkah ba pala, moa dipeda “tusah baka orang ti minta puji” (Matthew 6:16). Tang suah pengawa nya di luar aja – di ati sida enda berubah. Nyamai kitai ngelala orang ti baka nya rebak diatu mega.

Ko Jesus: “Sagi-agi lelaki ke ditikah nya mengkang begulai enggau sida, sida enda bepasa” (Mark 2:19, Bup Kudus Baru). Bala nabi udah madah pasal pengerami tikah Allah Taala empu enggau Bansa Israel ila (Isaiah 62:4-5). Diatu Jesus empu madah ka diri pengantin lelaki nya, iya nya Allah Taala amat. Ketegal Yesus enggau sida maya nya, sida enda iboh bepasa. Sida patut gaga ati serta rami. “Maya deka datai alai lelaki ke ditikah nya deka diambi ari sida, nya baru sida deka bepasa” (2:20, BKB). Maya Yesus enda enggau sida agi, maya nya meh sidak patut bepasa. Bepasa ukai kena mantai moa ti tusah tang bepasa enggau ati ti berubah. Bepasa laban kitai rindu ka Iya, rindu deka ninga jako Iya, rindu ka besambiang ngagai Iya.

Enti kitai ka mereti pesan Jesus tu, kitai enda tau enda berubah runding, berubah perangai baru ulih nyambut pesan ngau jako Jesus tu: “Nadai siko orang deka nampal gari baju ngena chebik kain ti agi baru, laban tampal ti baka nya tentu deka ngasoh gari baju nya balat agi charik. Nadai mega orang nyimpan ai anggor ti baru ba kambut kulit ti udah dikena. Enti iya nyimpan ai anggor dia, kulit nya tentu pechah, lalu ai anggor enggau kambut nya tentu deka tebasau. Iya ti bendar, kambut kulit ti baru endor nyimpan ai anggor ti baru!” (Mark 2:21-22, Berita Manah).

“Kain ti baru” ngau “ai anggor ti baru” nya meh pesan ngau jako Tuhan Jesus Kristus. Nya meh Berita Manah ngau Roh Kudus ti dibai Jesus ngagai kitai. “Ai anggor ti baru” tu meh ngasoh kitai rami lalu “mabuk” semengat kitai. Nya meh ngasoh kitai muji Tuhan, rajin ngereja pengawa Tuhan, lalu ngulih ka kitai ngereja segala macham pengawa ti nyelai baka dipeda dalam Bub Kereja Rasul. Pia mega, badu kitai baka kambut kulit ti lama. Orang ti baka nya enggai berubah nyadi orang baru, lalu enggai meda gaya Gereja ti mansang. Serah diri ngagai Tuhan baka kambut kulit ti baru awak ka Jesus ti pengantin lelaki ngisi kitai enggau anggor ti baru, iya nya pesan Iya, serta Roh Iya ti ngaga kitai baru – lalu kitai deka gaga ati! Diatu (ukai ila aja) meh kitai udah bulih pengidup baru enggau serega.

Sembiang

Isi aku, O Tuhan Jesus, enggau ai anggor Nuan, iya nya pesan jako Nuan ti badas, lalu enggau Roh Kudus Nuan. Asoh aku berubah amat dalam ati nyin, nyadi orang baru ngena runding enggau perangai baru ti nitih ka iring Roh Kudus. Amen.

THINK BIG. START SMALL. GO DEEP.