Anang Semina Deka Dikumbai Orang Kudus Tang Ngelengka ka Ajar Allah Taala (Mark 7:9-13)

“Lalu ko Jesus nampong jako iya, ‘Kita pintar bendar, kebuah kita enda nerima adat Allah Taala, awak ka kita ulih ngemansang ka ajar kita empu. Ko ajar Moses, ‘Bebasa ka apai indai kita,’ lalu ‘sebarang sapa nyebut utai jai pasal apai tauka indai iya, enda tau enda kena bunoh.’ Tang kita ngumbai enti orang bisi utai ti tau dikena nulong apai tauka indai iya, ‘Tu Piring’ (reti nya tu enggi Allah Taala), nya alai iya tau enda iboh nulong apai tauka indai iya. Ngena jalai nya kita enda iboh ka ajar Allah Taala lalu nitih ka penemu ti di-ajar kita ngagai orang bukai. Agi mayoh utai bukai ti baka nya digaga kita”
(Mark 7:9-13, Berita Manah Ka Rebak Baru)

Jesus nyaut sida orang Parisi: “Kita ngelengka ka pesan Allah Taala, lalu nitih ka utai ti di-ajar mensia” (Mark 7:8). Ditu Jesus meri chunto sida ngajar adat mensia lebih besai agi ari pesan Allah Taala. Ko Iya, “Kita pintar bendar…” Tu ukai jako muji sida tang tu jako ngelese ka sida. Sida ngumbai sida pintar? Paul udah nulis: “Utai ti dikumbai dunya tu bepenemu nya nadai guna sakali di moa Allah Taala” (1Korint 3:19). Bisi kebuah sida nambah ka pesan Allah Taala, meri undang-undang ti mayoh, undang-undang ti berat ngagai orang – sida deka “ngemansang ka ajar” sida empu: adat mensia. Awak ka orang betuan ka sida ukai Allah Taala. Awak ka sida bepengaroh ngau bisi kuasa kena ngekang orang mayoh.

Ko jako Allah Taala diberi ngagai Moses: “Bebasa ka apai indai kita… sebarang sapa nyebut utai jai pasal apai tauka indai iya, enda tau enda kena bunoh.” Tang sida orang Parisi ngau bala pengajar Adat udah ngaga undang-undang kediri ti bingkok awak ka sida enda iboh meri utai ngagai apai indai sida. Ko sida, “Aku enda ulih nulong apai indai laban semoa utai aku udah enggi Allah Taala, nyadi Piring (tauka korban).” “Semua utai diserah kena ngereja pengawa Allah Taala”, ko sida, munyi baka orang Kudus. Laban sida orang ti bepengaroh ba rumah Allah, sida tau mega ngena utainya kena diri empu. “Tu Piring” ko sida awak ka orang ngumbai sida orang kudus, orang alim. Tang ti ke-amai iya sida enggai nulong apai indai. Sida deka ngena utai tauka duit sida kena dirik empu aja. Sida ngelengka pesan besai iya nya “Nuan enda tau enda rindu ka orang bukai” (Mark 12:31) nyadi “rindu ka diri empu” aja.

Orang Parisi mina peduli ngau meda utai ti di-luar aja (Mark 7:6-8). Tuhan Jesus – Guru ti Badas – deka meda ati kitai orang Kristian. Pengerindu Allah Taala enda bepanggai enggau utai ti di-luar baka jari ti kamah tauka enda (Mark 7:1-5), tang Iya meda ati kitai kudus tauka bedosa. Maya tu mayoh orang nyangka pengarap orang Kristian tu semina utai ti di-luar aja baka undang-undang grija ngau Adat mensia (bisi ngagai grija ari Minggu ka enda? Ngaga tanda regang ka enda? Bisi meri ngagai grija ka enda?). Tang pengarap kitai tu semoa iya terlebih dulu ari dalam ati kitai. (Bisi pengarap ngagai Allah Taala ka enda? Roh Kudus bisi tinggal dalam ati ka enda? Dosa udah diberesi enggau darah tuchi Jesus ka enda?). “Aku enda ngira mensia ngena chara mensia,” ko TUHAN, “Mensia meda gamal, tang Aku meda ati” (1 Samuel 16:7).

O Tuhan Jesus, aku enggai dikumbai orang Kudus tang ati aku jauh ari Nuan.

La aku merisa ati aku: Bisi pengasih Nuan tauka nadai?

Ngereja ka ajar Nuan tauka ngelengka ka iya?

Nitih pesan Allah Taala tauka agi bepegai ba ajar mensia?

Perisa ati aku Tuhan, tuchi ka meh iya ngena darah tuchi Nuan. Tu sampi aku. Amen.

THINK BIG. START SMALL. GO DEEP.