Perintah Allah Taala Besai Agi Ari Undang-Undang, Pemali Ngau Penti Kitai Iban! (Mark 7:1-13)

“Orang Parisi enggau sekeda sida pengajar Adat, ti datai ari Jerusalem, begelumu ngelingi Jesus. Sida meda sekeda murid iya makai enggau jari ti kamah, reti nya enda  dulu nuchi jari sida nitih ka jalai ti udah dipadah orang Parisi ngagai orang. Laban orang Parisi enggau samoa orang Judah nitih ka ajar aki ini sida: sida enda makai, enti sida enda dulu nuchi jari. Sida mega enda makai sebarang utai ti dibeli ari pasar, enti sida enda masu utai nya dulu. Sida mega nitih ka mayoh bengkah adat ti udah di-ajar ngagai sida, baka adat ti dikena masu mangkuk, periok, bisin engkeraju enggau perengka penindok. Nya alai ko sida orang Parisi engggau pengajar Adat, nanya Jesus, ‘Nama kebuah sida murid nuan enda nitih ka ajar aki ini kitai, tang sida makai ngena jari ti kamah?’”

(Mark 7:1-5, Berita Manah Ka Rebak Diatu)

Orang Parisi udu besembiang. Sida rindu amat dikumbai orang kudus, orang alim. “Sida rindu bediri lalu besampi dalam kanisa enggau di sebelah sukut jalai pasar, ngambi ka genap iko orang ulih meda sida,” ko Jesus (Matthew 6:5). Iya mega bejako, “Leboh kita besembiang anang ngena mayoh leka jako ti nadai reti, baka orang kapir, ti ngumbai Allah Taala deka ninga ka sida laban sampi sida panjai” (6:7). Jesus mega madah, “Anang mandang ka utai [ti diberi ka orang] kena minta puji”; “Leboh kita bepasa, anang bemoa tusah baka orang ti minta puji… ngambi ka genap iko orang nemu sida bepasa” (6:16). Tu semoa jako Jesus ngagai sida murid iya pasal sida orang Parisi!

Orang Parisi ngau sida pengajar Adat udah ngaga 613 undang-undang agama. Baka chunto Hari Sabat, bisi 39 undang-undang ti mit, ngau dalam sigi undang-undang nya bisi agi undang-undang lain! Sida ngaga undang-undang kelalu mayoh lalu pesan Allah Taala ti berat bendar enda dikelala agi. Baka bungai rose ti manah tang dikelingi beribu-ribu babas ti mit-mit, lalu bungai rose enda dipeda agi. Ujong ya, iya udah alah laban babas ti mit. Pia peneka Allah Taala enda dipeda agi. Jako Allah enda didinga agi lalu ditutup baba’ undang-undang ti mit.

Orang Parisi ngasak orang bukai mega nitih ka samoa undang-undang nya. “Sida ngadu ka ma ti berat,” ko Jesus, “lalu manggai ka ma nya atas belakang orang, tang sida empu nadai satunjok nulong orang ngangkat ka ma nya” (Matthew 23:4). Baka dalam jako Mark 7:5, sida ngasoh bala murid Jesus masu jari sebedau makai. Ukai masu jari aja, tang masu lengan mega nitih ka undang-undang ti ditampong sida ari Jako Allah Taala, ti datai ari “ajar aki ini” sida.

Jesus ukai nganu sida ketegal enda masu jari (enti jari kitai kamah, amat patut kitai masu ka jari kitai) tang ketegal sida tu pengelakar! Mata sida Parisi tebuka besai meda orang ngelanggar ka undang-undang ti mit baka masu jari, tang sida kedirik buta enda meda sida iya ngelanggar ka Perintah Allah Taala ti besai. Ko Jesus nyaut sida, “Utai nya betol bendar nunda ka jako nabi Isaiah, leboh iya benabi ka pasal kita! Kita ti pengelakar, betol bendar munyi ti udah ditulis iya; ‘Orang tu, ko Allah Taala, bebasa ka aku ngena mulut sida aja, tang ati sida jaoh ngejang ari aku. Sida nadai guna nyembah aku, laban sida ngajar orang pesan ti digaga mensia baka ti ngajar adat Allah Taala!’ Kita ngelengka ka pesan Allah Taala, lalu nitih ka utai ti di-ajar mensia’” (Mark 7:6-8).

Diatu, anang kitai mantah orang Parisi kelia aja. Uji ngabas ati diri empu. Kati kitai kala baka orang Parisi? Enka suah kitai besembiang ngena mulut aja, leka jako disebut mayoh amat dimoa orang tang ati kitai jaoh ngejang ari Allah Taala? Kitai ka amat dikumbai orang kudus, orang alim – ngepost pesan Kristian ba mua bup seari-ari – tang pemikir kitai jaoh ngejang ari Jako Allah Taala? Ukai sida orang Parisi aja bisi undang-undang baka nya, tang kita mega bisi Adat Iban ti mayoh undang-undang. Baka chunto pemali leboh orang ti ngandong. Enti kitai Iban, jako aki ini kitai kelia, ngelanggar undang-undang nya, iya tau sial, bebadi-mati, tauka sakit-lengit labah udah ngeringat ka semengat utai tauka bala antu di langit. Kitai orang Kristian ti pechaya ngagai Tuhan Jesus Kristus ti Pengelepas kita, arap ka Iya aja! Anang kitai kiroh ka utai baka nya!

Anang “enda iboh ka ajar Allah Taala lalu nitih ka penemu ti di-ajar kita ngagai orang bukai” (Mark 7:13). Jako Allah Taala besai agi ari jako mensia! Tu jako Tuhan Jesus: “Datai ngagai aku, samoa kita ti lelak ngema utai berat [undang-undang mensia, ajar aki ini], lalu Aku deka ngasoh kita lantang. Pegai pesan Aku lalu simpan ba ati kita, lalu pelajar ka ari Aku, laban Aku lemi lalu enda besai ati; lalu kita deka bulih pengelantang. Pesan ti deka diberi Aku ngagai kita mudah, lalu ma ti deka di-asoh Aku bai kita lempong” (Matthew 11:28-30).

Sembiang

O Tuhan Jesus, Nuan datai ngelepas ka kami ari ma berat, iya nya mayoh bengkah undang-undang, pemali enggau penti. Tulong aku badu nyadi ulun utai nya, tang ajar aku nitih ka Perintah enggau Peneka Nuan aja. Laban “ma ti deka di-asoh Aku bai kita lempong.” Amen

THINK BIG. START SMALL. GO DEEP.