Berita Manah: Bagi Iya Ti Arap, Ai Idup Deka Lilih Ari Ati Iya (John 7)

 

John pasal 7 tu dibaca ari Berita Manah Ka Rebak Diatu: Sempekat Baru dalam Jako Iban (Iban New Testament, 2nd Edition) ari The Bible Society of Singapore, Malaysia & Brunei, 1981 📖⚡😊 #ServeToLead #InjilJohn #BeritaManah #SempekatBaru

FB Page: https://facebook.com/LEGASI.tv/                 
Podcast: https://anchor.fm/LEGASI.tv/             
YouTube: http://bit.ly/LEGASItv

THINK BIG. START SMALL. GO DEEP.

Jesus ngau Perintah Allah Taala; Nuan Deka Nyukong tauka Ngelaban Iya

“’Enggau bendar Aku madah ngagai kita, semua mensia deka diampun ari dosa sida enggau ari jaku busung sida, tang barang sapa bejaku busung ngelaban Roh Kudus, enda diampun, laban iya ngereja dosa ti mengkang belama iya’ (Jesus nyebut nya laban sida udah nyebut, ‘Iya bisi roh ti jai’)”
(Mark 3:28-31, Bup Kudus Baru)

Bisi dua macham munsoh ti ngelaban Perintah Allah Taala dalam Injil Mark 3:20-35, iya nya pengajar Adat ari Jerusalem serta sida sebilik Jesus empu.

Ko sida bala pengajar Adat, “Iya bisi Belsebup dalam Iya, lalu Iya muru antu ngena kuasa raja antu” (Mark 3:22). Jesus nyaut sida, “Baka ni ku Sitan ulih muru Sitan? Enti perintah bepechah-belah ngelaban diri empu, perintah nya enda tan. Lalu enti ruang bilik bepechah-belah ngelaban diri empu, ruang bilik nya enda tan. Lalu enti Sitan bepechah-belah ngelaban diri empu, iya enda tan, lalu perintah iya deka abis” (3:23-25). Enggau jako nya, Jesus madah ka sida iya, “Aku muru antu ngena kuasa ari Roh Kudus ukai ari raja antu!” Ia madah sigi pan kuasa Sitan amat kering, Tuhan Jesus empu lebih kering agi ari Sitan! Semina Jesus ulih “nanchang orang ka kering nya [Sitan]” (3:27). Enti kitai baka pengajar Adat, kitai ngelaban Roh Kudus. Retinya, kitai nutup ati diri lalu nulak pengawa Roh Tuhan Jesus dalam ati kitai. Enti kitai baka nya, nadai jalai Jesus deka nyelamat ka kitai.

Pia mega, sida sebilik kaban belayan Tuhan Yesus empu pan enda nerima pengawa Iya. Sida nagang Jesus ngereja pengawa Allah Taala lalu deka mai Iya pulai ka rumah di Nazaret laban bisi orang madah: “Iya [Jesus] nyau udah gila!” (3:21). Mayoh orang diatu baka nya; enda ngasoh kaban belayan nyadi pastor, padri, tauka penulong Kristian sepenuh masa. Mayuh apai indai enda ngasoh anak-anak sida nulong pengawa gereja (lebih agi nitih ka gereja bukai) serta pengawa ka guna orang mayoh. Bisi mega orang ngumbai penulong Tuhan Jesus nya orang gila!

Tiap iko kitai mesti milih: sekalika begulai enggau Tuhan Jesus lalu nitih ka Perintah Iya, tauka ngelaban Iya baka sida pengajar Adat ari Jerusalem serta sida sebilik Jesus. Nadai jalai tengah. Kitai mesti milih siti aja. Enti kitai deka begulai enggau Jesus lalu milih Iya, kitai mesti ninga ka Jako Allah serta ngereja ka iya. Kitai mesti nitih ka ator Allah Taala, ukai ngelaban Anak Iya. Ko Tuhan Jesus, “Sapa indai Aku? Sapa menyadi Aku? Tu meh indai Aku enggau menyadi Aku! Barang sapa ngereja peneka Allah Taala, nya meh menyadi lelaki, menyadi indu, enggau indai Aku” (Markus 3:33-35).

Sembiang

O Tuhan Jesus, bai aku nyadi penulong Nuan. Kering ka aku awak ka aku enda takut orang ngumbai aku gila, sekalika dirasok antu. Ajar aku nitih ka ator Allah Taala aja lalu pia nyadi menyadi Nuan. Amen.

THINK BIG. START SMALL. GO DEEP.

Jesus, Aku Sedia Deka Mending ka Penemu Enggau Runding Nuan

“Ko Jesus bejako enggau orang ti mati berang sapiak, ‘Mansang ka moa kitu.’ Udah nya ko iya nanya orang mayoh, ‘Nama utai ti di-asoh Allah Taala kereja kitai leboh Hari Sabat? Nulong, tauka ngemedis ka orang? Ngidup ka seput mensia tauka munoh nyawa ia?’ Tang sida nadai bejako saleka. Jesus ringat leboh iya merening sida, tang iya mega lalu sinu meda sida, laban sida kelalu kieh sereta salah. Udah nya ko iya bejako enggau orang, ‘Unjor ka berang nuan.’ Orang nya ngunjur ka berang iya, lalu berang iya suman nadai utai ngawa. Nya alai sida orang Parisi lalu angkat ari kanisa terus baum enggau bala anembiak Herod, ngiga jalai kena ngelaban Jesus lalu munoh iya” (Mark 3:3-6, Berita Manah Ka Rebak Diatu).

[“Berang sapiak” bermaksud tangan lumpuh sebelah]. Leboh Hari Sabat, Tuhan Jesus tama ka dalam kanisa tauka balai gempuru (rumah sembiang orang Juda). Maya nya bala orang Parisi endang deka nekan ka Jesus ngereja utai ti salah awak ka sida ulih nangkap Iya. Bala orang Parisi kieh amat ati. Sida rindu ka runding diri aja lalu ngumbai samoa orang bukai salah.

Bisi dua macham pengringat ngau dua macham runding dalam crita tu: 1) “Jesus ringat leboh iya merening sida” orang Farisi baka nya. Iya ringat tang nemu nagang pengringat Iya enggau manah. Dalam pengringat Jesus, Iya mega “sinu meda sida”; 2) Bala orang Farisi “kelalu kieh sereta salah.” Pengringat sida enda di-tagang sida lalu mai sida begedi. Jesus deka ngidup ka orang, tang kategal pengringat orang Farisi deka munoh orang. Dalam kedua-dua chunto tu, nama macham pengringat nuan? Nya alai bisi utai ti di-pelajar kitai ari Injil Mark tu: Enti orang enggai berubah runding, nya ukai laban nadai orang ngajar sida. Jesus nemu amai ngajar tang sida bala orang Farisi tetap enggai berubah. Lapa? Laban sida ngumbai runding diri sigi (sabaka tauka manah agi ari) runding Allah Taala empu. Tu salah mai!

Kati ko tua ulih di-ajar? Kati tua mending ka orang, tauka arap ka runding diri aja lalu ngumbai iya badas ari samoa? Ingat anembiak Apai ti di-serga: Kitai patut baroh ati, lalu nemu diri kurang bepenemu. Buka ati kitai lalu sedia deka mending ka penemu Allah Taala. Baka nya kitai ulih nitih ka jalai-Iya – ukai jalai diri empu. Baroh ka ati laban mayoh pengawa ti jai bendar baka perang, bebunoh, sigi digaga orang laban sida ngumbai nya peneka Allah Taala tang sebenar iya datai ari runding diri empu ti bedosa. Ingat mega, enti kitai ngumbai diri nerima pesan Allah Taala, anang arap ka diri aja tang padah ka pesan nya ngagai raban Kristian ti bukai ti ulih di pechaya awak ka sida ngabas pesan nya, enggai ka kitai arap ka runding diri empu aja.

Sembiang

O Tuhan Jesus, pengingin ati aku suah salah laban enda di-tagang enggau runding ti manah. Iring runding aku, lalu tulong aku selalu nitih ka iring Nuan. Asoh aku baroh ati lalu mending ka runding orang Kristian ti bukai ti bepenemu dalam jako Tuhan, laban nya meh jalai Nuan ngiring ka aku. Amen.

THINK BIG. START SMALL. GO DEEP.