Jesus Ukai Semina Sinu Ati Meda Orang Ti Lapar... (Mark 8:1-10)

"Enda lama udah nya saraban agi bala besai datai begempuru. Leboh sida nadai agi utai dempa, Jesus ngangau sida murid iya, ko iya, ‘Aku sinu bendar ati meda orang mayoh tu, laban sida udah enggau aku tiga hari lalu diatu sida nadai utai dempa agi. Enti aku ngasoh sida pulai apin makai, sida tentu luput di rantau jalai, laban sekeda sida datai ari jaoh.’ Ko sida murid iya nanyak iya, ‘Dini endor di menoa puang tu kitai ulih ngiga pemakai ka orang ti ngemayoh tu?’”
(Mark 8:1-4, Berita Manah Ka Rebak Diatu)

Ditu kita medah pengasih Allah Taala ba Jesus Kristus, Iya “sinu bendar ati meda orang mayoh.” Engka sida murid Iya enda iboh ngagai orang mayoh, tang Jesus meda orang ti mayoh nya lalu ati Iya sinu laban sida udah nitih Iya tiga hari lalu bedau makai. Peda kita, sida udah mending ka jako Tuhan tang Jesus kiroh mega enggau pemakai sida seari-ari. Tu nunjok ka kitai iya nya Allah Taala deka nyukop ka semoa ti dipeguna kita. “Nya kebuah aku madah ngagai kita,” ko Jesus dalam Matthew 6:25, 32, “anang irau ka pemakai enggau utai di-irup kena ngidup ka nyawa kita, anang mega irau ka gari ti dikena kita… Apai kita ti di serega nemu kita beguna ka samoa utai nya.” Nadai utai ti besai ti enda ulih digaga Jesus ngau nadai utai ti mit ti enda dipeda Iya. Jesus bejako ngagai sida murid Iya laban Iya deka nunjok ka sida kereja ajih ti deka digaga Iya baru. Nya alai Iya nanyak sida, “Berapa mayoh roti ti kita agi tinggal?” “Semina tujoh tuko aja,” ko sida nyaut Iya (Mark 8:5).

Jesus ngambi tujoh tuko roti nya (seta dua tiga iko ikan ti mit) lalu “meri terima kasih ngagai Allah Taala, mechah ka utai nya, disua iya ngagai sida murid iya, awak ka sida lalu nyadong roti nya ngagai orang mayoh… Genap iko orang ampit makai sereta chukop kenyang. Samoa orang ti makai utai iya kira 4,000 iko” (Mark 8:6-8). Agi, peda kita, Jesus nyedia ka pemakai ngagai sida samoa sampai sida “chukop kenyang.” Ukai mimit, ukai chukop-chukop tang sampai “kenyang” ngau agi bisi “laloh” tinggal! (ayat 9). Penyinu ngau penyayau ati Jesus mesti nyadi ka teladan kita semoa. Jako Allah Taala ukai ngasoh kita besembiang enggau nyanyi muji Iya aja, tang Iya mega ngasoh kitai nulong orang ti bisi penangol ngau penusah. Amai kita nadai cukop duit tauka pemakai deka nolong 4,000 iko orang tang apa ti bisi di jari kita, enggau pengarap, nyah meh utai ti deka diguna ka Jesus kena ngaga kereja ajih. Am kita besampi: 

O Tuhan Jesus Kristus, Nuan sinu bendar ati meda orang lapar. Asoh kami mega ngelala orang ti lapar lalu sinu bendar ati ka sida. Tolong kami magi utai ti kemisi kami, pemakai kami kini tauka penemu kami, pemerindang kini tauka pengerindu kami. Amen.

THINK BIG. START SMALL. GO DEEP.

Jesus Enda Ulih Ngereja Kereja Ajih enti Nuan Nadai Pengarap (Mark 6:1-6)

“Jesus angkat ari endur nya lalu pulai baru ngagai menua Iya empu [Nasaret], lalu sida murid Iya nitihka Iya. Lebuh hari Sabat, Iya belabuh ngajar dalam balai gempuru, lalu mayuh orang alit ati ninga Iya. Ku sida, ‘Dini alai orang tu bulih semua utai tu? Nama penemu-dalam tu ti udah diberi ngagai Iya? Nama kereja ajih ti benung dikereja Iya tu?’”
(Mark 6:1-2, Bup Kudus Baru).

Tuhan Jesus datai ba menua Iya empu, iya nya Nasaret. Empai lama dulu ari nya, Iya udah nyuman ka siko indu ti sakit begetah dua belas taun. Iya mega udah ngangkat ka anak indu Jairus ari pemati (bacha Mark 5:21-43). Semoa sida tu bisi ngasai ka kuasa Tuhan Jesus – Mesiah serta Anak Allah Taala – laban sida bisi pengarap ngagai Iya. Tang sida orang Nasaret tu enda arap ka Iya. Sida mega enda arap ka Jesus nya nabi orang Israel. Lapa? Laban sida teleba meda Iya ari mit. “Iya tu tukang kayu, anak Maria, menyadi James, Joses, Judas, enggau Simon”* (ayat 3) ko sida. “Sida lalu nulak Iya.”

Menyadi* ti disebut ditu ukai menyadi amat Jesus, tang petungal Iya. Kaban belayan suah dikumbai menyadi taja sida ukai menyadi ari apai enggau indai ti sama. Semua orang diada ari apai indai, tang Jesus diadaka Maria ngenak kuasa Roh Kudus laban Iya “Anak Allah Taala” (Luke 1:35)

Yesus alit ati meda sida ti enda arap ka Iya. Lalu Jesus bejaku ngagai sida, “Nabi endang dibasa orang, kelimpah ari di menua iya empu, enggau ba bala kaban belayan iya empu, enggau dalam rumah iya empu” (Mark 6:4). Jesus sinu. “Iya enda ulih ngereja kereja ajih dia, kelimpah ari ngengkahka jari atas dua tiga iku orang ke sakit, lalu ngeraika sida” (ayat 5). Enti nadai pengarap, Jesus enda ngaga kereja ajih. Ukai Iya enda nemu tauka nadai kuasa, tang Iya nemu semua nya nadai reti bagi sida enti sida enda arap ka Iya. Kereja ajih dipeda sida baka main silap mata tauka kereja antu; ukai kereja Mesiah, Anak Allah Taala ti besai kuasa. Nadai guna ngaga kereja ajih enti sida iya udah netap ka ati enda pechaya ka Iya. Jesus “balat ati ke penadai pengarap sida” (ayat 6).

Ditu kitai meda takah jauh hubungan Jesus enggau sida kaban belayan Iya ba menua Iya empu – jauh amat – laban sida enggai arap ka Iya. Jesus deka ngagai semak sida, tang sida nulak Iya jauh. Jesus rindu deka begulai enggau sida, tang sida nutup ati sida. Jesus ka amat ngaga kereja ajih – maya nya pun Iya deka – tang sida nadai pengarap.

Kati ko nuan? Bisi nuan pengarap ti amat ngagai Tuhan Jesus? Deka nuan nyadi menyadi Iya ti pechaya ka Iya? Jesus bisi bejaku: “Sapa indai Aku? Sapa menyadi Aku?... Tu meh indai Aku enggau menyadi Aku! Barang sapa ngereja peneka Allah Taala, nya meh menyadi lelaki, menyadi indu, enggau indai Aku” (Mark 3:33-34). Nama peneka Allah Taala nya? Peneka Iya awakka nuan enggau aku arap ka Tuhan Jesus Kristus, Anak Allah Taala. Nuan mesti tetap arap taja pan bala kaban belayan nuan dudi ari ila enda. Bisi maya iya nuan mesti ngenjauh ka diri ari sida ti enda arap awakka nuan ulih semak agi ngagai Tuhan Jesus. Tetap arap, lalu nuan deka meda Iya ngereja kereja ajih dalam pengidup nuan.

Sembiang

Tuhan Jesus, Nuan meh Raja enggau Penebus aku. Aku deka selalu arap ka Nuan. Aku deka arap taja pan (bisi maya iya ila) pangan aku tauka kaban belayan aku badu nitih Nuan. Tulong meh aku, awakka aku ulih nulong orang lain ti sama bisi penusah baka aku mega. Aku deka arap ka Nuan, tambah ka pengarap aku tiap ari. Amen.

THINK BIG. START SMALL. GO DEEP.