Jesus Kristus, Aku Deka Pendiau ti Baru

“Tu pun Berita Manah pasal Jesus Kristus, ti Anak Allah Taala. Munyi ti ditulis dalam bup nabi Isaiah, ‘Ku Allah Taala bejaku, ‘Dinga! Aku ngirumka seruan Aku dulu ari Nuan; iya deka nyediaka jalai ke Nuan.’ Siku orang ngagau di menua puang: ‘Sediaka jalai ke Tuhan; Gaga jalai Iya rurus!’’ John Pemaptisa pegari di menua puang, madahka pemaptisa nesal ati ke pengampun dosa. Semua orang ari serata menua Judea, enggau ari Jerusalem mansang ngagai iya. Sida ngaku dosa sida, lalu iya maptisa sida ba Sungai Jordan. Gari John digaga ari bulu unta, lalu belulang ti melit punggung iya digaga ari kulit jelu. Lalu pemakai iya buntak enggau ai manyi. Ku iya madah ngagai orang mayuh, ‘Iya ke datai dudi ari aku lebih agi bekuasa ari aku, datai ke aku enda tau meremi lalu muka tali kasut Iya. Aku udah maptisa kita ngena ai, tang Iya deka maptisa kita ngena Roh Kudus’”

(Mark 1:1-8, Bup Kudus Baru).

Enti Raja empu deka datai tentu seruan iya datai dulu lalu nyedia ka jalai, madah ka orang bakani patut nyendia diri. Iya muai penanggol dulu. Nya meh pengawa John Pemaptisa. Raja ti besai nyau ka datai, ti udah ditulis bala nabi beribu-ribu taun dulu. Dikumbai sida “Messiah” tauka “Kristus.” Iya ka niri ka Perintah Allah Taala di dunya tu, ngasoh samoa bansa nyadi rakyat Iya, ti nitih ka pesan Raja. John, nabi ti pengabis ujong, lalu pengabis besai – Seruan Kristus empu.

“Gari John digaga ari bulu unta, lalu belulang ti melit punggung iya digaga ari kulit jelu. Lalu pemakai iya buntak enggau ai manyi (madu).” Pemakai iya semina chukup ngidup ka diri aja. Iya enda ingin sekali ka utai dunya. Iya ingin ka utai ti besai agi – nyedia ka orang ka penatai Jesus, Anak Allah Taala, iya nya Kristus. Nagang pengingin tuboh kitai, nya siti jalai ngalah ka lalu ngerusak mayoh bengkah penyai. John baka nabi Elijah kelia, ti ngerusak adat Baal, petara kapir, serta enggau imam Baal 40 iko. Baka Elijah mega John ngerusak pendiau kapir ba orang Juda.

John muai penanggol. Lalu penanggol ti besai ari semoa iya nya dosa. “Nesal ati ke dosa kita, laban Perintah serega nyau semak!” (Matthew 3:2). “Semua orang ari serata menua Judea, enggau ari Jerusalem mansang ngagai iya. Sida ngaku dosa sida, lalu iya maptisa sida ba Sungai Jordan.” Iya nyepoh ka sida dalam ai. Udah nya iya ngangkat ka sida baru ari ai. Nya tanda sida ninggal ka pendiau lama ti jai lalu bulih pendiau ti baru ti tuchi.

Pia kitai mega diasoh berubah, nitih ka jalai baru lalu nyadi orang baru. Enti kitai baka nya, Tuhan kitai ka amat datai (Tuhan nang udai datai dulu). Datai dini? Ba ati kitai, ba runding enggau pengawa kitai, ba rumah, ba bilik kitai, ba dunya kitai, ba pengidup kitai, nyadi Raja amat. Suah minta Tuhan Yesus Kristus datai ngambi ka megai nuan amat-amat. Tang kati penanggol udah dibuai ari ati nuan? Iya nya dosa?

Sembiang

Datai O Jesus, dalam ati aku! Amat bisi mayoh macham penyai ti nanggol penatai Nuan.

Buai nya, Tuhan, lalu pegai ati aku, pegai pendiau aku, nuan ti Messiah, Kristus Tuhan aku.

Aku deka bulih pendiau ti baru. Amen.

THINK BIG. START SMALL. GO DEEP.

Diambik, disemak, disalin ngau diubah ulih aku ari Mending Ka Tuhan: Berati ka Injil St Mark

Ditusun ulih F.A. Vergeer M.H.M.

Imprimatur: Rt. Rev. Bishop Dominic Su, D.D., Januari, 1996.

Dikeluar ulih: Diocesan Centre, 1, Lanang Road, P.O. Box 495, 96007 Sibu, Sarawak.