Jesus Nanya Kitai Samoa, "Bisi Nuan Meda Utai?" (Mark 8:22-25)

“Sida datai di Betsaida, tu endor sekeda orang mai siko orang ti buta ngagai Jesus, minta Iya negu orang ti buta nya. Jesus megai jari orang ti buta nya lalu ngiring iya pansut ari luar tumpok rumah nya. Udah Iya ngeludah mata orang ti buta nya, Jesus lalu ngengkah jari Iya atas orang nya, sereta nanya iya munyi tu: ‘Bisi nuan meda utai?’”
(Mark 8:22-23, Berita Manah Ka Rebak Diatu)

Ari pun Injil tu, saint Mark udah madah ka kitai siapa Jesus ti ke amai: “Tu Berita Manah pasal Jesus Kristus, ti Anak Allah Taala” (Mark 1:1). Tang sida orang Parisi ti belajar ka Bup Kudus enda nemu siapa Iya (8:11-3). Sida bala murid-Iya ti selalu enggau Jesus mega bedau nemu siapa Iya (8:14-21). Sida tu semoa iya buta dalam roh. Sida orang Parisi enda meda laban sida enda pechayak. Sida murid Iya enda meda laban sida bedau bisi pengarap. Jesus udah meri mayoh tanda awakka sida ‘meda’ chunto iya: Jesus bejalai atas ai, ngasoh kabut tedoh, nyuman ka orang ti dirasok antu, ngau meri beribu-ribu iko orang makai. Dalam crita tu, Jesus deka nyuman ka orang buta meri ka sida - ngau kitai - tanda baru. “Orang ti buta ulih meda,” ko Jesus, “lalu orang ti meda nyadi buta” (John 9:39).

Mula ya, Jesus “megai jari orang ti buta nya” nunjok ka pengasih Iya ti enda sumbong baka orang Parisi ti nemu Jako Ajar tang nadai pengasih Allah Taala ba ati sida. Udahnya Iya “ngeludah mata orang ti buta nya” laban tu meh utai ti ulih di asai ka orang nya. Iya enda ulih meda tang iya ulih ngasai ka kereja Jesus maya Iya “ngengkah jari Iya atas orang nya” [orang maya Injil tu ditulis nemu cara ngubat ngena ludah]. Lalu Jesus nanya iya, “Bisi nuan meda utai?” Orang nya nengkadah, ko iya, “Aku meda mensia, tang sida dipeda baka kayu bejalai kia-kia.” Jesus agi ngengkah ka jari Iya atas orang nya. Sakali tu orang nya melut ka mata iya, nya alai iya enda agi buta, lalu terang meda samoa utai (Mark 8:24-25). Puji Tuhan! Orang ti buta ulih meda! Nama ti ulih dipelajar ka kitai ari crita tu? Lapa Jesus nyuman ka orang nya dalam dua rengat? Tu ulih nyadi ka tanda:

Rengat Ka-1: “Meda mensia… baka kayu bejalai kia-kia…” Sama mega baka sida orang Parisi ngau murid Jesus tu semina meda Jesus ti mensia aja tang ukai Mesiah tauka Anak Allah Taala. Maya tu mega mayoh orang bedau bisi arap ka Jesus. Bisi kategal mata roh sida di buta ka antu sitan [besampi ka sida], bisi mega laban bedau cukup pengarap [tusoi Berita Manah ngagai sida], bisi agi ti endang enggai deka arap [sida tu enda ulih di tulong].

Rengat Ka-2: “Enda agi buta, lalu terang meda samoa utai…” Tang bisi mega orang ti ngelala sapa Jesus ti amai. Ko Peter, “Nuan tu Mesiah” (Mark 8:29). Maya Imam Besai nanya Jesus, “Kati nuan amat Mesiah, Anak Allah Taala ti Beberekat?” Jesus ngaku (tang Imam Besai agi enda pechayak), Iya nyaut, “Aku tu meh Iya!” (Mark 14:61-62). Ngagai kitai ti arap ka Jesus ngau udah di beri Roh Kudus, mata kitai enchelak lalu ulih meda samoa pemendar-Nya. Mata roh kitai terang!

Kati ko gaya nuan meda Jesus? “Baka kayu bejalai kia-kia”? Tauka “terang meda samoa utai”? Jesus nanyak nuan ari tu: “Bisi nuan meda utai?”

THINK BIG. START SMALL. GO DEEP.