Jesus endang Tuhan Hari Sabat (5 Cara Nuan Nyambut Hari Minggu)

“Nyadi sakali Jesus bejalai ba umai gandum, maya Hari Sabat. Leboh bala murid Iya bejalai enggau Iya, sida lalu belaboh ngumpol tangkai gandum. Nya alai ko sida orang Parisi bejako enggau Jesus, ‘Peda nuan, sida murid nuan ngelanggar Adat kami, sida enda tau ngereja pengawa ti baka tu leboh Hari Sabat!’ …Lalu ko Jesus ngujong ka jako Iya, ‘Hari Sabat digaga ka guna mensia, ukai mensia digaga kategal Hari Sabat. Nya alai Anak Mensia ti Tuhan Hari Sabat’”
(Mark 2:23-24, 27-28, Berita Manah ka Rebak Diatu).

Bala murid Jesus lapar, nya alai sida belaboh ngumpol tangkai gandum benong bejalai maya Hari Sabat. Nya ngasoh orang Parisi mantah Jesus. Sida terit bendar nitih ka Adat orang Juda. Maya Hari Sabat (kenu sida) enda tau nyendia pemakai, berapi pun enda tau, bejalai lebih ari sekilometer enda tau, nyuman orang sakit enda tau. Semua nya ngaga kerja ti ngelanggar Hari Sabat, ko sida. Hari Sabat digaga sida baka ari ngulit – hari tusah. Tang Undang-Undang Allah Taala ukai digaga kena nusah ka orang (Amat mayoh orang agi tekelalu bebasa ka Adat Mensia, datai ka enda peduli enti bisi mensia mati baka dalam “Perang Ugama”). Ko Tuhan Jesus, “Hari Sabat digaga ka guna mensia, ukai mensia digaga kategal Hari Sabat.” Ka guna mensia, awak ka ngidup lalu ngemansang ka mensia.

Uji kitai ngaga Hari Minggu “ka guna mensia” baka tu: 1) Ngaga iya Hari Kudus, hari Tuhan, hari sembiang. Ingat, Jesus udah angkat idup baru leboh Hari Minggu. Roh Kudus nurun mega Hari Minggu. Nya alai Gereja ti terubah kelia udah nukar Hari Sabat (sepatut ya Hari 6) ngagai Hari Minggu; 2) Maya ari tu kitai nyerah ka pendiau kitai serta pengawa ti dikerja kitai saminggu-minggu ngagai Allah Taala. Anang kitai baka semut ti bejalai kia-kia aja lalu enda kala ngetu. Kitai mensia mesti ngetu lalu berunding – Nama kabuah pengawa kitai? Nama tuju pendiau kitai ditu di dunya? Ngisi perut lalu mati? Tauka idup ngereja pengawa Tuhan Jesus? Bisi kitai nulong Allah Taala ngaga dunya tu manah agi endor diau ka samoa orang? Hari Minggu tu meh maya kitai nyerah ka semoa pengawa ngagai Tuhan awak diberkat ka Iya;

3) Ngereja pengawa badas maya Hari Minggu baka nulong orang ti seranta, ngabas orang sakit tauka ngagai orang tuai. Kena ari tu merekat ka orang lain; 4) Hari Minggu meh ari kitai belelak laban tu ukai ari bekeja berat baka ari bukai. Tu ari gawai, ari nyamai, hari gaga ati iya nya hari “special”; 5) Kena Hari Minggu maya nuan berati lebih agi ka Jako Tuhan Jesus. Macha, belajar serta ngenung ka Perintah Allah Taala. Enggau semoa cara tu kitai merati ka Hari Sabat tauka Hari Minggu (enggau jalai ti lain mega), kitai udah ngasoh Jesus nyadi “Tuhan Hari Sabat.” Sigi ya, Jesus Kristus meh Tuhan Hari Sabat!

Sembiang

Trima Kasih Tuhan Yesus ka Hari Minggu ti diberi Nuan ka guna kami. Tulong aku beguna amat ka iya, ukai enggau ngelusu aja, ukai enggau gawa aja baka ari bukai – tang kena ngelantang serta nyuman ka diri enggau orang lain. Nyaga meh tubuh aku enggau semengat aku awak ka Nuan meh Tuhan atas Hari Sabat dalam idup aku. Amen.

THINK BIG. START SMALL. GO DEEP.