Jesus enggau Nuan Maya Ribut Nyadi ba Pengidup Nuan (Mark 4:35-41)

“Lemai nya Jesus bejaku ngagai sida murid Iya, ‘Aram kitai ngelayang ke seberai.’ Sida lalu ninggalka orang mayuh, mai Iya enggau sida dalam perau. Perau bukai mega mupuk enggau Iya. Kabut besai nyadi, lalu gelumbang mangka ngagai perau sida datai ke perau nya nyau deka karam. Iya tinduk di kemudi, gali ba panggal. Sida ngerak Iya, lalu bejaku, ‘Pengajar, kati Nuan enda ibuhka kitai nyau deka mati?’ Jesus dani lalu ngerara ribut, lalu bejaku ngagai gelumbang, ‘Teduh! Diau jenuh!’ Ribut lalu teduh, lalu ia nadai agi berumbak. Ku Iya bejaku ngagai sida, ‘Nama kebuah kita takut? Kati kita mengkang enda arap?’ Lalu sida balat takut, sereta belabuh bejaku enggau pangan diri, ‘Sapa orang tu datai ke ribut enggau gelumbang ngasika Iya?’”
(Mark 4:35-41, Bup Kudus Baru).

“Sapa orang tu datai ke ribut enggau gelumbang ngasika Iya?” Pia ko bala rasul dalam perau bejaku tentang Tuhan Jesus Kristus. Mula ya sida takut ngagai kabut seta gelumbang, tang udah kabut teduh, sida balat takut ngagai Jesus. Amai besai kuasa Iya. Tu kitai semoa mesti nemu; Jesus tu mensia, iya mega lemi lalu alah laban panas enggau ujan, laban kabut serta gelumbang; tang Iya mega Anak Allah Taala ti ngaga langit enggau bumi, panas enggau ujan, kabut enggau tasik. “Semua utai ti di serega enggau di dunya udah digaga ulih Kristus… ke Kristus” (Kolosi 1:16). Laban Iya mensia, Iya “tinduk di kemudi, gali ba panggal”; laban Iya mega Anak Allah Iya ulih “ngerara rIbut, lalu bejaku ngagai gelumbang.”

Mayuh utai ti kitai ulih blajar ari jaku Tuhan tu. Tu sigi: Perau nya ulih dibandingka enggau pengidup kitai orang Kristian. Bala rasul nya ulih disamaka enggau kitai semoa. “Kabut” tentu bisi, baka utai ti slalu ngacau pengarap kitai ngagai Kristus. Engka “ribut” tu baka orang ti deka nyimpang pengarap kitai ke ugama bukai; baka orang ti enda ngasoh kitai ngajar pengarap Kristian ngagai anak sekolah kitai empu; tauka baka orang politik tik enda peduli ngagai kitai laban pengarap kitai ngagai Kristus. Engka “gelumbang” tu baka orang ti ngajar adat ti enda setipak enggau ajar Injil ti amai lalu mai mayoh orang limping; baka orang Kristian ti enda peduli ka Jako Tuhan agi taja pan sida slalu ngagai gereja; tauka baka apai-indai ti nganuk kitai begulai fellowship enggau gereja bukai. Semua penanggul seta pengirau kitai (lebih-lebih agi pengawa sitan) tu meh baka “kabut” ti deka ngerusakka pengarap kitai.

Dalam semoa tu, anang kitai kurang pengarap! Ingat, Tuhan Jesus Kristus bisi mega dalam “perau” taja pan Iya suah dipeda kitai tinduk (Jesus enggau kitai dalam semoa penusah. Uji kitak perati dalam Jaku Tuhan tu: “Perau bukai mega mupuk enggau Iya.” Sida kebukai sama mega dalam perau serta kabut ngacau sida, tang sida ba perau bukai. Semina orang Kristian aja bisi Tuhan Kristus sama enggau kitai dalam perau). Jesus bekuasa dalam semua pengirau enggau penanggul. “Ribut lalu teduh, lalu ia nadai agi berumbak.” Ko Jesus dalam Injil Matius: “Semua kuasa di serega enggau di dunya udah diberi magang ngagai Aku… Aku deka seruran enggau kita nyentuk ngagai pengujung dunya” (28:18, 20). Anang lelak ngereja ka pengawa Iya. Intu badas mengarap kitai ngagai Iya! Enti kitai didalam Iya ngau Iya didalam kitai, taja pan bisi “kabut besai”, Tuhan Jesus tetap enggau kitai lalu kitai enda nemu karam.

Sembiang

O Tuhan Jesus, suah kami kena mayoh macham kabut enggau gelumbang ba pengidup kami. Lalu suah kami kurang amat pengarap, ngumbai Nuan enda peduli, meda – baka Nuan agi ‘tinduk.’ Tambah ka pengarap kami ngagai Nuan, ngambi ka kami badu kakang ngau takut. Nuan ti bekuasa belama-lama iya. Amen.

THINK BIG. START SMALL. GO DEEP.