Nadai Utai Ti Nemu Agi Ngakal Ari Ati Mensia Tang Jesus Ulih Nuchi Ati Kitai (Mark 7:14-23)

“Udah nya Jesus ngasoh orang mayoh datai ngagai iya sakali agi, lalu ko iya bejako enggau sida, ‘Dinga ka ulih kita, lalu pereti ka! Ukai utai ari luar ti tama ka dalam mensia ti ngasoh iya enda tuchi, tang utai ti pansut ari dalam iya ti ngasoh iya enda tuchi (Dinga ka ulih kita, enti kita bisi pending kena ninga!).’ Udah iya ninggal ka orang mayoh, iya lalu tama ke dalam rumah. Sida murid iya lalu nanya ka reti jako sempama nya ngagai iya. Ko Jesus bejako enggau sida, ‘Penemu kita mengkang enda lebih ari penemu orang bukai. Kati kita enda nemu? Nadai utai ari luar ti tama ke dalam mensia tau ngasoh iya enda tuchi, laban utai nya enda tama ke dalam ati iya, tang ngagai perut iya, udah nya lalu pansut ari tuboh iya.’ (Leboh nyebut nya, Jesus mega madah ka samoa pemakai tau dempa magang).”

(Mark 7:14-19, Berita Manah Ka Rebak Diatu)

Gaga ati aku ninga Jesus madah samoa pemakai tau diempa magang! Iya meh Tuhan ti ngelepas kitai ari mayoh macham pemali enggau penti. Amat Jesus Pengelepas mensia. Ko Iya, “Ukai utai ari luar ti tama ka dalam mensia ti ngasoh iya enda tuchi, tang utai ti pansut ari dalam iya ti ngasoh iya enda tuchi.” Pemadas sekalika penyai orang ukai bepanggai ba pengawa iya ari luar tang bepanggai ba peragam enggau runding iya dalam ati. Kitai nemu pengawa ti digaga kitai semoa ya “pansut ari dalam ati” kitai. Enti ati iya manah, iya deka ngaga utai di manah; enti ati iya kamah, iya agi ulih belakon nyadi orang manah tang pengujung iya, iya deka nunjok peragam enggau runding iya ti jai lalu ngaga mayoh macham penyai.

Nabi Jeremiah bisi nulis: “Sapa nemu ati mensia? Nadai utai ti nemu agi ngakal ari ati mensia. Iya kelalu balat sakit lalu enda ulih digeraika” (Jeremiah 17:9, Bup Kudus Baru). Baka sida orang Parisi, sida iya ngakal (‘hypocrite’, pura-pura, ngaga diri manah). Di moa orang sida manah, baka masu jari sebedau makai (Mark 7:3). Sida bepasa, meri sedekah ngau besembiang “ngambi ka genap iko orang ulih meda sida” (Matthew 6:2, 5, 16). Ko Jesus nampong jako Iya ngagai sida murid Iya tadi: “Utai ti pansut ari dalam iya, nya ti ngasoh iya enda tuchi. Laban peragam ti jai datai ari ati iya, nya ti ngujong ka iya ngereja utai jai: baka nerumpak, munoh orang, butang, amu lalu ngereja samoa macham utai ti jai; ngelakar, ngereka penyai, kepapas, nyumpah, sumbong enggau ngelusu, samoa utai nya datai ari ati mensia lalu ngasoh iya enda tuchi” (Mark 7:20-23).

“Nadai utai ti nemu agi ngakal ari ati mensia,” ko Jeremiah. Jesus madah: “Utai ti pansut ari dalam iya, nya ti ngasoh iya enda tuchi.” Kati ko kitai ulih nuchi ati kitai ti jai? Kati ko kitai “ngeraika” ati kitai? Enti kitai empu, enda ulih... tang Jesus ulih nuchi ati kitai! Halleluyah! Enti kitai “ngaku enggau mulut kita, ‘Jesus endang Tuhan,’ lalu arap enggau ati kita, Allah Taala udah ngangkat ka iya ari mati, kita deka idup” (Rome 10:9) lalu “ngelengka ka dosa kita” (Mark 1:4,15), lalu Roh Kudus deka diau dalam ati kitai – ati kitai dituchi ka Jesus enggau darah-Iya. Kitai ulih ngereja jako enggau pengawa Iya laban Roh Kudus Iya diau ba ati kitai: rindu ka Allah Taala enggau pengabis ati ngau rindu ka orang bukai asai rindu ka diri empu. Ati kitai deka ngemansut ka buah roh di badas: “pengerindu, pengaga, pemaik, pengeliat ati, penelap, pemadas, penalok, pemaroh ati enggau runding ti ulih nagang tuboh diri” (Galatia 5:22).

Aku nemu, kadang-kadang pengawa kitai dipeda orang enda badas tang iya pansut ari ati ti badas. Pengawa nya enda salah, baka nuan enda besembiang Hari Minggu kebuah nuan enda tau enda ngintu orang ti sakit, tauka nuan bula laban nuan deka nyelamat ka orang lain ari kena bunoh (bacha Joshua 2). Ukai pengawa di luar ti berat agi guna (tang tu ukai alasan kitai ngaga penyalah ngau dosa), tang ati kitai dalam nyin. Nya alai anang tusah ati enti enda nuchi jari, tang minta Allah Taala nuchi ati kitai. Tuhan Jesus madah ka penemu ti bendar lalu nulak penemu ti ngakal. Kati ko gaya penemu nuan?

Sembiang

Trima kasih Tuhan Jesus laban Roh Kudus Nuan diau dalam ati aku.

Tuchi ka ati aku ari semoa penyai. Asoh rurus awakka samoa jako

enggau perangai ti pansut ari ati aku rurus serta tuchi mega. Amen.

THINK BIG. START SMALL. GO DEEP.