Jesus Nanya Nama Kebuah Kitai Mengkang Enda Mereti ka Pengawa Iya (Mark 8:14-21)

“Sida murid Iya enda ingat mai roti mayoh agi, semina satuko aja, ka bekal sida dalam perau. ‘Peda lalu bejaga kita,’ ko Jesus ngelalau sida, ‘enggai ka kita kena laban ragi orang Parisi enggau ragi Herod.’ Ko sida bejako enggau pangan diri, ‘Iya nyebut jako nya laban kitai nadai roti.’ Jesus nemu utai ti dikerandau sida, nya alai Iya nanya sida, ‘Nama kebuah kita berandau ka diri nadai roti? Kati kita lalu enda nemu tauka apin mereti? Kati ko ati kita bangat muntat? Kita bisi mata - kati kita enda meda? Kita bisi pending - kati kita enda ninga?”
(Mark 8:14-18, Berita Manah Ka Rebak Diatu)

Sebedau tu, Jesus baru udah bejako enggau orang Parisi (baca Mark 8:11-13). Sida orang Parisi udah meda mayoh macam kereja ajih ti udah digaga Iya tang sida mengkang mega kieh ati lalu enda pechaya enggau Iya. Nya alai Jesus madah, “Peda lalu bejaga kita enggai ka kita kena laban ragi orang Parisi enggau ragi Herod.” Nama reti nya? ‘Ragi’ ba Bup Kudus eti iya ‘penyaik’ tauka ‘ajar ti jai.’ Ragi dikena maya ngaga roti awakka roti tau kembai ngau berubah ukur nyadi besai. Pia mega ajar orang Parisi ti jai tau nyadi besai enti kitai pechaya ka jako sida (besai tang kusong). Kitai ulih alit ngau kieh ati lalu runding kitai berubah. Tu ti nyadi ngagai sida murid Jesus. Ukai semina orang Parisi enda arap ka Jesus tang bala murid Iya empu mega buta ati enda ngelala Iya. “Kati kita lalu enda nemu tauka apin mereti?,” ko Jesus. “Kati ko ati kita bangat muntat? Kita bisi mata - kati kita enda meda? Kita bisi pending - kati kita enda ninga?”

Jesus udah ngaga mayoh macam kereja ajih ba mua sida. “Kati kita enda ingat, leboh Aku mechah ka roti ka dempa lima ribu iko orang? Berapa bakol laloh roti ti dibai kita?’ ‘Dua belas iti bakol,’ pia ko sida nyaut. ‘Leboh aku mechah ka tujoh tuko roti ka dempa empat ribu orang, berapa bakol laloh roti ti dibai kita?’ ‘Tujoh,’ pia ko sida. Ko Iya nanya sida, ‘Nama kebuah kita mengkang enda mereti ka utai nya?’” (Mark 8:18-21). Semoa jako ajar enggau kereja ajih ti digaga Jesus nunjok ka sida - ngau kitai mega - Berita Manah pasal Jesus Kristus empu ti “Anak Allah Taala” (Mark 1:1). Tang apa ti di ati sida ngau semoa orang mayoh ti ngiga Jesus? Sida iya nitih Jesus laban “udah makai roti datai ka kenyang” ukai kategal sida udah “mereti ka kuasa” Iya (John 6:26); sida iya kiroh ketegal enda ingat mai roti tang enda nemu Jesus nya meh “Roti Pengidup” ti datai ari serega (John 6:32-35); sida irau enggau pemakai ngau tuboh tang Jesus udah madah barang siapa ti ngasi ka pengawa Iya ba kayu regang sida deka “bisi pengidup ti meruan… meruan idup belama” (John 6:52-58). Tu tanyak Jesus ngagai kitai semoa: Nuan udah nemu siapa Aku ti amai tauka nuan mengkang enda mereti? Am bersampi:

O Tuhan Jesus Kristus, beri aku ati ti terang nemu siapa Nuan lalu nulak ka ajar orang Parisi ti enda arap ka Nuan. Buka ka mata aku awakka aku ulih meda pemendar Nuan ngau buka mega pending aku awakka aku bisi ninga ka jako Nuan. Amen.

THINK BIG. START SMALL. GO DEEP.