“Sekeda orang Parisi datai ngagai Jesus lalu bekelikoh enggau Iya. Sida deka nguji Iya, nya alai sida minta Iya ngaga kereja ajih, kena nunjok ka pemendar ari Allah Taala. Jesus matak seput Iya lalu bejako, ‘Nama kebuah orang ti kemaya tu minta kereja ajih? Enggau bendar Aku madah, Aku enggai! Nadai pemendar ti baka nya deka dipandang ka ngagai sida!’ Udah nya Iya ninggal ka sida, nepan ka dalam perau lalu ngelayang ka seberai danau”
(Mark 8:11-13, Berita Manah Ka Rebak Diatu)
(Mark 8:11-13, Berita Manah Ka Rebak Diatu)
Enda kala aku ninga ayat “matak seput” dalam jako Iban (dalam English “sighed deeply”). Dalam Alkitab Versi Borneo iya ditulis “mengeluh.” Jesus mengeluh maya Iya ninga pinta sida orang Parisi. Sekumbang 3 taun Iya udah mantai ka diri “Anak Allah Taala” (Mark 1:1) ti deka nebus, ti nyuman ngau ti ngelepas, tang sida orang Parisi kelalu kieh ati taja pan sida udah meda mayoh amat tanda ti nunjok ka Jesus tu Mesiah tauka Kristus ti udah disemaya bala nabi kelia ba Sempekat Lama. Pengidup Iya ti tuchi nadai kala bedosa, ajar Iya ti endang jako Allah Taala empu ngau semoa kereja ajih ti udah digaga Iya baka meri makai beribu-ribu orang (Mark 6:30-44, 8:1-10), nyuman ka orang ti bengal, ti bisu, ti dirasok antu ngau mayoh agi (Mark 5-7). Semoa nya udah di ayan ka Jesus ngagai orang Parisi ngau sida bala murid Iya. “Nama kebuah orang ti kemaya tu minta kereja ajih?” ko Jesus, “Enggau bendar Aku madah, Aku enggai!” Ukai Iya amai enggai tang sida buta!
Enti mata kita buta, kita agi ulih nerima pemendar. Tang enti kita buta dalam ati ngau roh, Jesus, Anak Allah Taala, ba depan mua pan kita enda nerima. Nya kebuah Iya madah, “Nadai pemendar ti baka nya deka dipandang ka ngagai sida!” Ngagai sida ti bisi pemuta ba roh, Jesus madah dalam John 9:39, “Aku datai ka dunya tu deka ngeletak ukum, ngambi ka orang ti buta ulih meda, lalu orang ti meda nyadi buta.” Kati ka nuan maya tok? Bisi meda Jesus tauka enda? Enti nuan bisi ati deka meda Iya, besampi ngagai Allah Taala awakka Iya “ti udah nyebut: ‘Ari dalam petang pansut penampak ti terang!’ Sama Allah Taala nya ti ngasoh penampak Iya manchar ka dalam ati kita, ngambi ka kita nemu pasal mulia Allah Taala ti manchar dalam moa [Jesus] Kristus” (1 Korint 4:6). Am kita besampi:
O Tuhan Jesus Kristus, aku deka meda mulia Allah Taala ti dipanchar ari moa Nuan. Aku minta terang mulia Nuan ngemenuh ka mata aku awakka aku enda kieh ati baka sida orang Parisi. Pia mega, kena meh aku nyadi saksi Nuan di dunya ti agi idup dalam pemetang. Amen.
THINK BIG. START SMALL. GO DEEP.
No comments:
Post a Comment