Jesus Begulai Enggau Orang ti Bedosa (Anang Kelalu Sibok Enggau Pengawa di Gereja)

Lewi tauka Matthew, ngereja pengawa ya nyadi pengumpol chukai.
Ia urang Yahudi tang ia nyadi ulun orang Rom

“Benong [Jesus] bejalai dia Iya meda orang pengumpol chukai, nama iya Lewi anak Alpius, dudok ba opis iya. Ko Jesus bejako enggau iya, ‘Titih ka aku.’ Lewi angkat, lalu nitih ka Iya. Dudi ari nya Jesus makai ba rumah Lewi. Lalu mayoh orang pengumpol chukai enggau orang ti bedosa nitih ka Jesus, lalu sekeda sida dudok makai begulai enggau Iya enggau bala murid Iya. Sekeda pengajar Adat, ti endang orang Parisi, meda Jesus begulai makai enggau sida ti bedosa enggau orang pengumpol chukai; nya alai sida nanya murid Iya, ‘Nama kebuah Iya makai begulai enggau orang ti baka nya?’ Jesus ninga sida lalu nyaut, ‘Orang ti pengerai enda beguna ka lutor, tang orang ti sakit aja. Aku datai ukai deka ngiga orang ti lurus, tang sida ti bedosa’”
(Mark 1:14-17, Berita Manah Ka Rebak Diatu).

Sekeda Parisi mantah Tuhan Jesus laban Iya makai begulai enggau orang pengumpol chukai enggau orang bedosa. Mayoh orang Kristian baka orang Parisi; ka begulai enggau pangan sida aja, kaban sida ti manah; nyamai, rami amat begempuru dalam gereja, dalam Prayer-Meeting tauka randau ruai.

Tang Tuhan Jesus ka amat begulai enggau orang tesat, orang lain pendiau, orang ti kena indik orang bukai, orang ti dikumbai nadai guna. Ukai laban pengingin tuboh Iya ka baka nya, tang laban Iya enggai meda sida dibuai. “Aku datai ukai deka ngiga orang ti lurus, tang sida ti bedosa.”

Lalu orang bansa nya tebuka ati ka agi nyambut jako Tuhan Jesus. Ko Jesus ba Injil Luke: “Roh Tuhan di atas aku, laban iya udah milih aku, ngasoh aku nusoi Berita Manah ngagai orang ti seranta. Iya udah ngasoh aku nusoi pasal pengelepas ngagai sida ti kena tangkap, lalu sida ti buta di-asoh meda; sida ti kena perinsa dilepas ka, lalu madah ka taun endor Tuhan deka ngelepas ka anembiak iya” (4:18-19). Lewi, iya nya “Matthew, ti pengumpol chukai” (Matthew 10:3), ia mega siko orang baka nya. Jesus ngelepas ka Lewi? Bakani? Tuhan Jesus begulai makai enggau iya. Jesus nerima iya nyadi kaban Iya.

Kelia beribu-ribu orang ti bekerja ba kompeni-kompeni nyau surut ari adat Kristian di menoa Eropah laban sida Padri gagau amat gawa dalam gereja lalu enda ingat ka sida ke luar ari gereja. Pia mega ditu, enti kitai enda ngiboh ka sida (Uji nuan ngira, berapa kali nuan begulai enggau orang ukai Kristian dalam seminggu? Kala nuan sengaja enda betemu enggau kaban Kristian nuan sekali-sekala laban nuan deka begulai enggau kaban ti enda sama pengarap ngau nuan? Berapa kali nuan enggau gereja besembiang ka Malaysia tang udah nya enda iboh ka orang di sekeliling nuan?). Kitai enda patut ngira PANGKAT diri lebih agi ari orang lain, sekali ka iya kaya tauka miskin, tinggi tauka baroh, kuli tauka tuan. Samoa orang Kristian diberi Tuhan Jesus pangkat sama sebaka enggau orang Kristian ti bukai, iya nya – Anak Raja, anak-anak Allah Taala.

Ukai kitai patut muji Tuhan dalam Prayer-Meeting tauka maya di gereja aja, tang kitai nitih ka chunto Tuhan Jesus ti begulai enggau orang ti mit, ti bedosa, ti lain ari kitai. Semua nya pulai ka pemuji mega.

Sembiang

Tuhan Jesus, Nuan ka amat begulai enggau sida ti dikumbai orang “nadai guna.” Tulong aku Tuhan. Enda ngerari ka diri ari sida, ngumbai sida baroh agi ari aku. O Tuhan, aku ka nitih Nuan lalu begulai enggau sida awak ka Nuan ulih nyuman ka sida, ngau aku ulih besaksi ka pemesai Nuan dalam idup aku. Amen.

THINK BIG. START SMALL. GO DEEP.