Jesus Negu lalu Nyuman Ka Orang Sakit Lan (Sanggup Nuan Ngaga Chunto Jesus tu?)

“Siko orang ti sakit lan mansang ngagai Jesus, besugang di moa Iya lalu bejako minta tulong Iya, ‘Tuan, enti nuan deka, nuan ulih nyuman ka aku.’ Jesus sinu bendar ati, nya alai Iya ngunjor ka jari lalu negu orang nya, ko Iya, ‘Aku deka! Beresi meh tuboh nuan!’ Tekala nya penyakit lan ti makai tuboh iya lalu nadai agi. Udah nya Jesus bejako berat-rat enggau iya lalu ngasoh iya angkat ari endor nya, ko Iya, ‘Ingat nuan! Anang nusoi tu ngagai sebarang orang, tang lalu terus mansang ngagai imam, minta iya meresa tuboh nuan; udah nya beri piring nunda ti udah dipadah Moses, kena nentu ngagai genap iko orang, nuan udah beresi’”
(Mark 1:40-44, Berita Manah Ka Rebak Diatu).

Taun 1873 siko padri benama Damian (tauka “Father Damien” tauka “Saint Damien of Molokai”) bejalai ka Molokai, Hawaii; lalu dia iya begulai diau enggau kira-kira 720 iko orang ti sakit lan. Sida enda diasoh diau ba pasar tauka rumah panjai tang diau kediri aja enggai ka penyakit nya ngerampit. Damian nuchi pisa sida, merindang sidak, datai ka iya empu kena sakit lan mega lalu parai. Crita amai tu tau dipeda ba crita di gaga taun 1999 betajuk Molokai: The Story of Father Damien (Maya nya lutor siko baru udah tetemu ka ubat ti tau nyuman ka penyakit nya).

Orang sakit lan ba Injil Mark tu tadi diau kediri mega. Tang Tuhan Jesus Kristus kasih, lalu berani negu iya. Diatu agi mayoh orang ti diau kediri lalu enda diasoh begulai enggau orang mayoh, laban orang mayoh enggai meda sida. Engka nya bansa bukai, ukai Iban, engka kulit chelum kini, lalu ko jako: “Sida enda olih dikarap ka.” Engka sida seranta, begari kamah. Engka jako iya lain, bok iya, gaya iya lain, adat lain. Engka iya udah kena penjara. “Orang nya lain amat”, ko kitai. Uji kitai empu bepikir ngabas ati diri - sapa orang ti enda diasoh begulai enggau kitai? Tuhan Jesus begulai enggau samoa, lebih agi enggau orang seranta, sakit, orang ti diindik, diburu tauka orang ti beperangai enda manah. Samoa nya sigi diasoh Iya nyadi diri menyadi. Bakani ko kitai?

“[Terus] mansang ngagai imam, minta iya meresa tuboh nuan… kena nentu ngagai genap iko orang, nuan udah beresi” tauka udah tuchi. Bala imam ngau tuai-tuai adat Judah nerima iya baru laban iya udah beresi seta tuchi. Enti Tuhan Jesus negu orang – jai pan perangai iya – ia mesti diterima ngagai kitai orang Kristian. Baka chunto ngau ketegal Jesus nerima iya, nya alai orang mayoh mega patut nerima iya, awak ka iya ngasai diri ukai orang ti ditulak agi tang diterima baka samoa kitai, baka nuan empu udah diterima Tuhan Jesus.

Sembiang

Mayoh orang ngelinggi aku baka orang ti sakit lan nya, Tuhan Jesus, lalu ditulak orang mayoh. Tulong aku nerima orang nya baka diri menyadi. Laban nya meh chunto Nuan, Nuan ti negu orang ti kena sakit lan, Nuan ti pengibun bedus manah. Amen.

THINK BIG. START SMALL. GO DEEP.